خلیلزاد بیرته کابل ته راغلی دی

ولسمشر غني د افغان سولې لپاره د امریکا له ځانګړي استازي زلمي خلیلزاد سره کتلي دي. له ارګه د خپرې شوې خبرپاڼې له مخې، غني نن سهار د افغان سولې لپاره د امریکا متحدو ایالتونو د بهرنیو چارو وزارت له ځانګړي استازي زلمي خلیل‎زاد، سره کتلي دي. خبرپاڼه کاږي، په دې کتنه کې چې په ګلخانې ماڼۍ کې وشوه، د ولسمشر دویم مرستیال سرور دانش او اجراییه رییس ډاکټر عبدالله عبدالله هم حضور درلود، ډاکټر زلمي خلیل‏‏زاد ولسمشر ته بېلابېلو هېوادونو ته د خپلو وروستیو سفرونو په اړه د راپور ورکولو پر مهال وویل، د امریکا متحده ایالات د سولې په برخه کې د افغانستان د حکومت په مشرۍ هر ډول همکارۍ ته چمتو دي او په دې برخه کې د دوی هڅې دوام لري. خبرپاڼه کې راغلي، چې افغان حکومت د هر هغه اقدام او هڅې مننه او قدرداني کوي چې په افغانستان کې د تلپاتې سولې د تامین لپاره وي. دا په داسې حال کې ده، چې نن وال سټرېټ ژورنال ورځپاڼې په یو مطلب کې لیکلي و، چې خلیلزاد دوحه کې طالبانو سره کتلي دي. سرچینې وړانډې ویلي و، چې نوموړی به بیرته کابل ته لاړ شي او د یادې لیدنې جزییات به افغان حکومت سره شریک کړي.