چین: خپل سوداګر افغانستان کې پانګونې ته هڅوو

د چین لومړي وزیر یادې څرګندونې له اجراییه رییس عبدالله عبدالله سره په لیدنه کې کړې دي. لي کیګیانګ په تاجکستان کې د شانهګای همکارۍ سازمان غونډې په څنډه کې له عبدالله سره په لیدنه کې دغه راز ویلي، چې دوی به خپل سوداګر وهڅوي څو په افغانستان کې پانګونه وکړي. هغه ویلي، هېواد یې تل په افغانستان کې د پایداري سولې غوښتونکی دی او دوی به په دې برخه کې خپلې هیڅ راز هڅې ونه سپموي. لي زیاته کړه، چې دوی چمتو دي په دې برخه کې خپل مثبت رول ولوبوي. لي دغه راز زیاته کړې، چین به په هر اړخیزه توګه له افغانستان نه خپل ملاتړ ته دوام ورکړي او هڅه به وکړي څو په دې هېواد کې وضعیت بهتر شي. دا په داسې حال کې ده، چې عبدالله د یاد سازمان غونډه کې د وینا پر مهال ویلي و، چې افغانستان د تروریزم قرباني دی او دا پدیده یواځې افغانستان نه بلکې ټولې سیمې ته ګواښ پېښولی شي، نو په کار ده د سیمې ټول هېوادونه په دې برخه کې د افغانستان لاسنیوي او ملګرتیا وکړي.