د کندهار امنیه قوماندان وايي، پر ډېورنډ فرضي کرښې د پاکستان له خوا د اغزن تار غځولو ته اجازه نه ورکوو.
جنرال عبدالرازق پرون پژواک خبري اژانس ته ویلي، پاکستان د هېواد د ختیځو ولایتونو په څېر په سوېل کې هم پر ډېورنډ فرضي کرښې د اغزن تار غځولو کار پیل کړی، خو سرحدي ځواکونو یې مخنیوی کړی دی.
هغه زیاته کړې: «پاکستاني ځواکونو دوې اونۍ وړاندې د سپین بولدک او ښورابک ولسوالیو تر منځ د سرو څاهانو په سیمه کې پر ډېورنډ فرضي کرښې د اغزن تار غځولو کار پیل کړ چې سرحدي ځواکونو لګول شوې پایې لرې او د هغوی د کار مخنیوی یې وکړ.»
دی وايي چې د دوی د دغه کار په غبرګون کې وسله والو طالبانو د پاکستان په لارښوونه په سپین بولدک، معروف، ارغستان او ښورابک کې پر سرحدي ځواکونو پراخ بریدونه وکړل.
د ده په خبره، د دوی موخه دا وه چې سرحدي ځواکونه بوخت وساتي او دوی په ډاډه زړه دا اغزن تار وغځوي.
امنیه قوماندان یادونه کړې چې سرحدي ځواکونه به د خپلې خاورې د دفاع په خاطر یو ځل بیا پر ډېورنډ فرضي کرښې د پاکستان له خوا د تاسیساتو جوړولو او اغزن تار غځولو مخنیوی وکړي.
د جنرال رازق په وینا، که طالبانو ته رښتیا د هېواد ځمکنی تمامیت او ملي ګټې ارزښت لري، نو له پاکستاني ځواکونو سره دې د ممکنه جګړې پر مهال افغان ځواکونو ته مزاحمت او د دوی پر امنیتي پوستو دې بریدونه نه کوي.
ده څرګنده کړې چې پر ډېورنډ کرښې به د اغزن سیم غځولو ته په هېڅ ډول اجازه ور نه کړي او د دښمن د هر ډول اشغال مخنیوی به کوي.
د یادونې ده چې یو کال مخکې ډېورنډ کرښې ته څېرمه د کندهار د سپین بولدک ولسوالۍ اړوند د لقمان او جهانګیر سیمو د ملکیت پر سر د افغان او پاکستاني ځواکونو تر منځ سخته نښته وشوه چې دواړو لورو ته پکې درنه مرګ ژوبله واوښته.
لقمان او جهانګیر کلي د ډېورنډ کرښې په صفري برخه کې د سپین بولدک اړوند هغه دوې سیمې دي چې پاکستاني لوري یې د ملکیت دعوه کوله او دغلته یې سرشمېرنه کوله چې د افغان ځواکونو له خوا یې مخنیوی وشو.
له همدې امله د دواړو لورو ترمنځ سخته جګړه وشوه چې څو ساعته یې دوام وکړ.
جګړې نه یوازې دواړو لورو ته درنه مرګ ژوبله واړوله، بلکې د سپین بولدک لار هم د ۲۳ ورځو لپاره د هر راز تګ راتګ پر مخ وتړل شوه چې له امله یې خلکو او سوداګرو ته میلیونونه افغانۍ زیان واوښت.
