چین: د افغان حکومت د سولې له ټولو هڅو ملاتړ کوو

چین وایي د ثبات، امنیت، سولې او ترهګرۍ ضد مبارزې په برخه کې د افغان حکومت ملاتړ کوي. د چین لومړي وزیر کچیانګ ویلي، دوی له خپلو ټولو امکاناتو په استفادې هڅه کوي چې د افغانستان په بیارغونه کې مرسته وکړي. دده په وینا چین مخکې هم ویلي او اوس بیا ټینګار کوي چې دوی د افغانانو په مشرۍ او مالکیت د سولې له هر ډول خبرو ملاتړ کوي. دده په خبره د ترهګرۍ ضد مبارزې په برخه کې هم چین د افغان حکومت ملاتړ کوي او په دې تړاو هر راز مرستو ته تیار دی. د کچیانګ په خبره چین د افغان سولې او ثبات لپاره درې اړخیزه ډله رامنځ ته کړه چې په هغه کې افغانستان، پاکستان او چین شامل دي. دده په وینا چین دغه درې اړخیز بهیر ته هم ادامه ورکوي او موخه یې په افغانستان کې د امنیت راوستل او ستونزو له منځه وړل دي.