د ټاکنو خپلواک کمېسیون وايي چې د نا امنیو او ځینو نورو تخنیکي ستونزو له کبله په غزني او د افغانستان په لسو نورو ولسوالیو کې د ولسي جرګې او د ولسوالیو د شوراګانو ټاکنې نه کېږي.
د ټاکنو د خپلواک کمېسیون ویاند حفیظ الله هاشمي د یکشنبې په ورځ خبریالانو ته وویل: «د بغلان ولایت دهنه یې غوري، د بدخشان وردوج او یمګان، د سرپل کوهستانات، د زابل خاک افغان او د هلمند ولایت نوزاد، موسی کلا، دیشو، ریګ خانشین او بغران هغه ولسوالۍ دي چې د تلې په ۲۸ به ټاکنې د نا امنیو له امله پکې ترسره نه شي.»
هغه وویل چې د غزني په ولایت کې بیا د سیاسي ستونزو له کبله ټاکنې نه کېږي. خو داسې انګېرل کېږي چې ښايي د غزني ولایت ټاکنې د جمهوري ریاست له ټاکنو سره یو ځای وشي.
نوموړي وویل، چې د نوملیکنې پروسې له پیله تر دا مهاله په ټول افغانستان کې د ولسې جرګې ټاکنو لپاره نهه تنه نوماندان په بېلابېلو پېښو کې وژل شوي دي.
د ټاکنو خپلواک کمېسیون دغه راز وایي، د تلې په ۲۸ مه به ۲۳۵ زره ناظرین چې ۱۹ یې نړیوال دي، د ولسي جرګې له ټاکنو څخه نظارت وکړي.
نوموړي تېره ورځ په کابل کې خبریالانو ته وویل ۱۰۷ بنسټونو چې سیاسي ګوندونه، مدني بنسټونه، سفارتخانې او د ټاکنو د څار بنسټونه پکې شامل دي، د نظارت لپاره نومونه لیکلي دي.
نوموړي وویل: «تر اوسه ۲۳۴ زره او ۵۱۴ کسانو د نظارت کارتونه اخیستي دي چې له دې شمېرې څخه یې ۱۹ تنه یې نړیوال ناظرین دي.»
هاشمي وویل، چې د ټاکنو ټول حساس او غیر حساس وسایل او بایو مېټریک دستګاوې له ټولو ملحقاتو سره ولایتونو ته رسېدلي دي او ولسوالیو او ټاکنیزو مرکزونو ته یې هم د لېږد پروسه پیل شوې ده.
هغه وویل، چې د جمعې تر ورځې پورې به دغه وسایل ولسوالیو او د رایې ورکولو مرکزونو ته ولېږدول شي.
د ټاکنو د خپلواک کمېسیون ویاند سید حفیظ الله هاشمي وویل چې له بایومیټریک څخه د ګټې اخیستنې لپاره کمېسیون ۲۱ زره کارکونکي روزلي او لا هم دغه روزنه دوام لري.
