ټاکنو کمیسیون: دیني عالمان دې د ټاکنو په اړه خلکو ته پوهاوی ورکړي

د ټاکنو خپلواک کمیسیون رییس ګلاجان عبدالبدیع صیاد نن له دیني عالمانو سره په مشورتي ناسته کې وویل، چې د ټاکنو کمیسیون به په خپلو طرحو او کړنو کې له دیني عالمانو نه سلا مشورې اخلي او دغه راز دیني عالمانو ته به دا زمینه برابره کړي، چې خلکو ته د ټاکنو په اړه داسلامي اصولو مطابق معلومات ورکړي تر څو په ټاکنو کې ګډون وکړي. صیاد وویل، ټاکنې یا بیعت د اسلام یو اصل دی او د اسلام خلیفه ګان هم د جبر په اساس نه بلکې د ټاکنو او رای پر اساس خلافت ته رسیدلي دي. د ټاکنو کمیسیون په دغه ناسته کې له بیلابیلو ولایتونو څخه۳۰۰ دیني عالمانو ګډون کړی و. د ټاکنو خپلواک کمیسیون په داسې حال کې په ټاکنو کې د خلکو په ګډون ټینګار کوي، چې تیره اونۍ وسله والو طالبانو د ټاکنو د ګډوډولو ګواښ کړی و، را روانې پارلماني ټاکنې یې دوکه او فریب بللې دي.