د ټاکنو خپلواک کمېسیون وايي چې د ولسي جرګې ټاکنو ته ټول عملیاتي او تخنیکي پروګرامونه بشپړ شوي دي.
د ټاکنو د خپلواک کمېسيون رييس ګلاجان عبدالبدیع صیاد پرون له سیاسي ګوندونو، مدني ټولنو او کورنیو او بهرنیو نظارت کوونکو سره د ټاکنو په ملي غونډه کې له خلکو غوښتنه وکړه چې له کمېسیون سره د ټاکنو د روڼتيا په برخه کې مرسته وکړي.
صياد زياته کړه: «د ټاکنو ټول عملیاتي، تخنیکي او عملي پروګرامونه بشپړ شوي، د راتلونکې شنبې په ورځ به د هېواد په ۳۳ ولایتونو کې د ولسي جرګې لپاره انتخابات ترسره کېږي، له هېوادوالو مو غوښتنه دا ده چې په ذوق او شوق سره په انتخاباتو کې برخه واخلي او د خپلې خوښې کاندید ته رایه ورکړي او د خپل پارلمان برخلیک په خپله وټاکي.»
صیاد وايي چې د ولسي جرګې را روانې ټاکنې له پخوانیو هغو سره ځکه توپیر لري چې د رایې ورکوونکو نوملړ، د پېژندلو ځانګړي قلمونه او رنګونه او همدا شان د بایومېټریک سیسټم دستګاوې پکې کارول کېږي.
نوموړی وايي، د افغانستان اوسني وضعیت ته په کتو د ټاکنو خپلواک کمېسیون د ولسي جرګې د ټاکنو د روڼتيا لپاره تر دې ډېر څه نه شي کولای.
صیاد له ټولو افغانانو وغوښتل چې په ټاکنو کې د فساد، تخلف او درغلیو نښې نښانې له ليدلو سره سم له مسوولو کسانو سره شريکې کړي.
د ولسي جرګې ټاکنې د راتلونکې شنبې په ورځ له غزني پرته په ټول افغانستان کې کېږي.
د ټاکنو خپلواک کمېسیون وايي، د دې ټاکنو د څار لپاره نږدې درې لکو کورنیو او یو شمېر بهرنیو څارونکو ځانونه ثبت کړي دي.
په افغانستان کې د ملګرو ملتونو مرستندوی دفتر يا یوناما په را روانو ټاکنو کې د کورنیو ناظرانو ونډه مهمه بللې ده.
په ورته وخت کې د ټاکنيزو شکایتونو کمېسیون وايي چې د ټاکنو په ورځ د شکایتونو د ثبت او د هغوی د خوندي ساتلو لپاره چمتووالی لري.
د دغه کمېسیون د دارالانشاء ريیس محمد علي ستیغ په پرونۍ غونډه کې وویل: «د لومړي ځل لپاره د ټاکنيزو شکایاتونو کمېسیون په ټاکنيزو مرکزونو کې استازي پر دندو ګومارلي، هر څوک چې د ټاکنو په ورځ د ټاکنو اړوند سرغړونې وویني، کولای شي خپل شکایت هلته ثبت کړي، ان شاءالله د شکایت کوونکي شکایت به خوندي وي.»
که څه هم د ولسي جرګې د راتلونکو ټاکنو پر وړاندې ناامنۍ تر ټولو ستر خنډ بلل کېږي، خو د ټاکنو خپلواک کمېسیون وايي چې امنیتي ځواکونو ورته د ټاکنو په ورځ د امنیت ډاډ ورکړی.
