سختې وچکالۍ، فقر او جگړو په میلیونونو افغانان د خوړو له نشتوالي سره مخامخ کړي او ملگرو ملتونو د وضعیت د لا خرابېدو خبرداری ورکړی دی.
ملگرو ملتونو د دوشنبې په ورځ خبرداری ورکړ چې لږ تر لږه درې میلیونه افغانان عاجلو غذایي توکو ته اړتیا لري او که مرسته و نه شي، نو له قحطۍ سره به مخامخ شي.
ملگري ملتونه دغه خبرداری په داسې حال کې ورکوي چې افغانستان له بې ساري قحطۍ او وچکالۍ سره مخامخ دی.
د افغانستان په شمالي او لوېدیځو حاصلخېزو ولایتونو کې وچکالي د دې سبب شوې چې په سلگونو زره کسان د خپلو کورونو او سیمو پرېښودلو ته اړ شي.
په افغانستان کې د ملگرو ملتونو د بشري مرستو همغږي کوونکي توبي لانزر ویلي چې ملگري ملتونه هڅه کوي، څو د نړیوالو مرستو په جلبولو سره لږ تر لږه له ۲،۵ میلیونه افغانانو سره چې غذایي توکو ته سخته اړتیا لري، د روان کال د ډسمبر تر نیمایي پورې مرسته وکړي.
لانزر د فرانسې خبري اژانس ته ویلي: «هغه خلک د ورځې یوازې په یو وخت خوړو چې هغه هم اکثره وچه ډوډۍ او چای دی، ژوند کوي».
د ملگرو ملتونو دغه چارواکي ویلي چې درې میلیونه کسان د غذایي مصونیت د نشتوالي له درکه په څلورمه درجه کې دي چې دا له قحطۍ نه یوازې یو درجه وړاندې حالت دی او جدي اقدام ته اړتیا لري.
لانزر ویلي چې تېره میاشت مرسته رسوونکو ډلو شپږ زرو اړمنو کورنيو ته غنم او غوړي وېشلي او ټاکل شوې چې د روانې میاشتې تر پایه به له شپږ زرو نورو کورنيو سره هم ورته مرستې وشي.
د لانزر په وینا، په افغانستان کې اته میلیونه نور خلک د غذایي بحران په درېیم پړاو کې ژوند کوي او د ماشومانو ترمنځ د سوء تغذي کچه خورا لوړه ده.
د اورښت کموالی او په تېر ژمي کې د واورو نه اورېدلو په وجه په نیم افغانستان کې وچکالي راغلې او د وچکالۍ په وجه لږ تر لږه ۲۵۰ زره کسان له خپلو سیمو بې ځایه شوي دي.
