د عدليې وزارت له اداري فساد سره د مبارزې د ځانګړی سکرتريت له اداري فساد سره د مبارزې ځانګړی کمېسيون جوړوي.
له اداري فساد سره د مبارزې د سکرتریت رييس یما ترابي وايي، نوی جوړېدونکی کمېسيون به له فساد سره په مبارزه کې ګټور تمام شي.
ترابي زياتوي: «له فساد سره د مبارزې په قانون کې چې څه نوي دي، هغه د پنځه کسیز کمېسیون جوړول دي چې له فساد سره د مبارزې په اړه د تدابیرو د نیولو، همغږۍ او پلي کولو په برخه کې ورته زیات صلاحیتونه ورکړل شوي دي، دغه کمېسیون له فساد سره د مبارزې د ستراتېژۍ پلي کول څاري».
ويل کېږي چې له اداري فساد سره د مبارزې کمېسيون به درې نارينه او دوه ښځينه غړي ولري چې د غوراوي کمېټې له لوري د ټاکل کېدو لپاره ولسمشر ته ور معرفي کېږي.
له اداري فساد سره د مبارزې د ځانګړي سکرتريت رييس دا خبرې له اداري فساد سره د مبارزي د قانون په اړه د معلوماتو د ورکولو او د فساد په برخه کې د اطلاعاتو د شریکوونکو د ملاتړ په اړه یوې خبري ناستې ته وکړې.
ترابي وویل چې دغه قانون د ملګرو ملتونو له اداري فساد سره د مبارزې د میثاق او له اداري فساد سره د مبارزې د ملي ستراتېژۍ له ژمنو سره سم، د مبارزې د بنسټونو د پیاوړي کولو په موخه پراخېږي.
د ترابي په خبره، دغه قانون داسې تدوین شوی چې له اداري فساد سره د مبارزې د موازي ادارو د فعاليت مخه نیسي، فعالیتونه یې قانوني کوي او د یو خپلواک کمېسیون تر چتر لاندې یې راولي.
دا په داسې حال کې ده چې له اداري فساد سره د مبارزې د مشابه، موازې او بې اغېزې ادارو له فعاليتونه شکايت کېږي.
د ولسي جرګې غړي او مدني فعالان وايي، حکومت له اداري فساد سره په مبارزه کې پاتې راغلی دی.
حقوقپوهان هم وايي چې حکومت له اداري فساد سره په اغېزناکه توګه مبارزه نه کوي.
د پوهنتون استاد ودیر صافی وايي، په افغانستان د فساد یو سېستم رامنځته شوی چې له لوړپوړو چارواکو نیولې، تر ټيټ پوړو مامورینو پورې پکې ښکېل او یو له بل سره همغږي لري.
دی ټینګار کوي چې د فساد د له منځه وړلو لپاره اړتیا ده چې حکومت او په تېره عدلي او قضايي ارګانونه جدي شي او قانون پلی کړي.
