د نن ورځې له سیالیو ډکې نړۍ، موږ ډېری د کسب و کار اوپه بدل کې یې د پیسو ګټلو ته سوق کړی یو. خو د پیسو ګټلو په نسبت ځینې نور داسې مهم شیان هم شته، چې که ورته پام ونه کړو، هغه پیسې چې موږ یې ګټو، د هغو ارزښت هم له منځه وړي. موږ په همدې مقاله کې د بدروس کویلیان له خولې درته هغه څلور شیان ښیو، چې د پیسو په نسبت زیات ارزښت لري.
۱ـ باور
پر ځان، موخو او هیلو ته پر رسېدو باور، انسان ته د ژوند کولو جرئت ورکوي. که تاسې پر خپل ځان باور ونه لری، هغه هڅې او کوښښونه چې تاسې یې په خپله دنده او کار کې کوی، کومه ښه پایله به ورنه کړي. وېره کولای شي هغه کسب و کار یا دنده چې ستاسې په ژوند کې حیاتي تغیرات راوستلای شی، له منځه یوسي او یا یې هم تر ډېر نابود حده ورسوي. ما دا موضوع ډېره ښه درک کړې ده. کله چې هغه کسان چې تاسې د بل هرچا په پرتله پرې ډېر باور کوی، ستاسې د نابودۍ کوښښ کوي، هغه وخت به ستاسې پر ځان باور ساتل ډېر سخت نه وي.
خو هغه وخت چې د یوې دندې او کار کولو په اړه خپله باور له لاسه ورکړی او داسې ووایئ چې ډېرې موخې مو ټاکلې وې یا یو بل څوک شته چې ستاسې په پرتله دغه کار په ښه ډول سرته ورسوي، هغه ده چې خپله مو د خپل ځان په نابودۍ لاس پورې کړی دی. حتی دا هم ممکنه ده چې له دندې او کاره مو لاس واخلی او د یو بل کس د ګټو لپاره پر کار لګیا شی، د هغه کس لپاره چې پر ځان باور لري.
ایا دا مو خوښېږي چې تاسې مو کارونه په هغه ډول چې مو خوښېږي، سرته ورسوی؟ باید پر خپل ځان او کار مو پوره پوره باور ولری، له دې هم وېره مه لری چې ممکن له سختو مسایلو سره به مخ شی؛ خو له دې هر څه سره سره بیا هم تاسې پر خپل ځان او کار باور ولری او په ټاکلې دنده او کار کې مو د لا اصلاحاتو د راوستو غوښتونکي شئ. تاسې پر همدې باور خپل کارونه مخکې یوسئ.
۲- روغتیا
ښه روغتیا تر پیسو په زرهاوو ځله غوره او ښه ده. که تاسې کارفرما یاستی، ممکن ډېر لږ له نورو کسانو مرسته وغواړی او ډېری وخت د خپل کار په اړه فکر کوی. که کومه ستونزه پېښه شي، مسوولیت یې ستاسې پر غاړه دی. کېدای شي دا موضوع یوڅه خطرناکه وي. دا باور تاسې ته وايي چې که تاسې هره ورځ کار ونه کړی او پیسې ونه ګټی، لرې نه ده چې همدا دنده او کار به مو له لاسه ورکړی.
پر خپلو کارکوونکو او همکارانو مو باور وکړئ، پرېږدئ چې هغوی خپل او تاسې هم خپل کارونه په ښه ډول سرته ورسوی. ډاډه اوسئ چې د دندې او کار لرل انسان ته توانايي ورکوي، ښه ده چې د نوو لارو چارو په لټه کې شی، څو مو هغه وړتیاوې او توانايي نوره هم لوړه کړي. د خپل ټیم له غړو سره ډېر کار وکړئ او د ښې پایلې د لاسته راوړلو لپاره یو پلان جوړ کړئ.
په همدې حال کې خپلې روغتیا او وزن ته پوره پوره پام وکړئ. لوبغالو ته لاړ شئ او د خپلې خوښې وړ لوبې وکړئ. د یو ښه او فعال ذهن تر شا یو قوي او پياوړی جسم وي. ښه ده چې دا خبره جدي ونیسئ. دا مهمه نه ده چې تاسې د پر یو مسلکي لوبغاړي یا ورزشکار بدل شی. یوازې همدومره کاپي ده چې خپلې موخې منظمې کړئ، هغه ته ورسېږی او د نوو موخو د لاسته راوړلو په لټه کې شی. همدا کار د دې سبب کېږي چې تاسې خپل کار ته ښه پام وکړی او ورځې تر بلې پرمختګ وکړی.
ایا ښه احساس نه لری؟ جرئت وکړئ او په دې اړه له مسلکي کسانو سلا مشوره وغواړئ. یو ښه ځای او موقف ته ستاسې د پوزیشن رسېدل، حتمي له تاسې یوه ښه نسخه غواړي. دا نسخه ستاسې خپلې روغتیا ته پام کول دي، په ښې روغتیا سره تاسې کولای شی ښه فکر وکړی، ښه پرېکړه وکړی اوخپل کاري ټيم بریا ته ورسوی.
۳- تجربې
په دې کې هېڅ شک نشته چې موږ په دې دنیا کې یو وار د ژوند کولو چانس لرو. هره ورځ کارځای ته تلل او هر ساعت کار او پیسې ګټل په ژوند کې ډېر حیاتي نقش نه لري، مانا دا چې تاسې نه باید د پیسو ګټلو په خاطر د ژوند ځینې حیاتي ارزښتونه چې واقعاً او رښتیا ژوند ته د اصلي ژوند مانا وربښي، له پامه وغورځوی.
تل اماده او تیار اوسئ، کله چې فرصت درته برابرېدو، سفر وکړئ. په هغو تفریحي برنامو کې چې ستاسې د اوسېدو ځای شاوخوا جوړېږي، برخه واخلئ. کېدای شي ستاسې بانکي حساب د ډېرو خلکو لپاره حیرانوونکی وي؛ خو هغه تجربې چې تاسې یې له ژوند څخه لری، خلکو ته تر بانکي حساب ډېرې په زړه پورې او خوږې دي. پیسې هېڅ وخت نه شي کولای تاسې دې ځای ته ورسوي.
تجربې د ژوند اجره(مزد) بلل کېږي. دا تجربې تاسې ته تر ټولو ښه درسونه درکوي او د نړۍ په اړه ستاسې فکر ته بدلون ورکوي. د سختو کاري مسایلو د حل لپاره هڅې، تاسې ته ښې تجربې دي.
۴- کورنۍ
ښه کورنۍ تر پیسو په زرهاوو ځله ښه ده. تاسې هر یو غواړی چې د خپلو اولادونو لپاره ستاسې د ماشوموالي په نسبت ښه ژوند برابر کړی. کله چې تاسې د پیسو ګټلو لپاره له کورنۍ لرې مسافر وی، ممکن ډېرې پیسې لاسته راوړی او په معنوي لحاظ د ځان لپاره ډېر څه وګټی. ځینې کسان داسې فکر کوي چې د زیاتو پیسو په ګټلو او د ښو امکاناتو په برابرولو سره کولای شی خپله کورنۍ خوشاله وساتي، خو هغه څه چې تر دې هرڅه زیات ارزښت لري، هغه له خپلې کورنۍ سره نږدې اوسېدل دي. تر وسه وسه کوښښ وکړئ چې له خپلې کورنۍ څخه د ډېر وخت لپاره لرې پاتې نه شی، که د پیسو ګټلو او کاروبار کولو لپاره په بل ځای کې مسافر هم وی، بیا هم کوښښ وکړئ چې په لنډ لنډ وخت کې خپل کور ته راشی او یو څه وخت له هغوی سره نږدې تېر کړی.
کله چې له کارځای څخه ماښام ستاسې کورنۍ ستاسې د راتګ انتظار کوي، پوه شی چې تاسې د هغوی پاچا یاستی. کوښښ وکړئ چې د خپل کاروبار، زده کړو، دندې او نورو مسوولیتونو تر څنګ، خپلې کورنۍ ته هم وخت ورکړی. له هغوی سره یوځای په چکر لاړ شئ، د هغوی د خوښې وړ خوراک برابر کړئ او ان په فردي ډول د کورنۍ د هر یوه غړي غوښتنې واورئ.
که تاسې ښې ډېرې پیسې ولری، خو نه مو پر ځان باور وي، نه ښه روغتیا ولری، نه له ژونده ښې تجربې ولری او نه ښه کورنۍ ولری؛ باور وکړئ هېڅ یاستی، ستاسې ژوند هېڅ مانا نه لري او نه هم خوند ترې اخیستی شی. خو که دا هرڅه ولری او بیا هم پیسې ونه لری، ستاسې ژوند د نړۍ تر اتیا سلنه خلکو ښه دی.
