اجرایه ریاست د ایران د بهرنیو چارو وزارت د وروستۍ ادعا په غبرګون کې چې ویلي يې دي، امریکا د افغانستان د سولې په مسئله کې جدي نه ده، د امریکا او ایران په ګډون د نړۍ له ټولو هېوادونو غوښتي چې له کابل سره د سولې په پروسه کې مرسته وکړي.
د اجرایه ریاست مرستیال ویاند امید میثم وايي چې جګړه د حللاره نه ده او افغان حکومت هڅه کوي چې روانې جګړې ته سیاسي حللاره وګوري.
نوموړي زیاته کړې: «سوله حکومت ته لومړیتوب لري، موږ د امریکا او ایران په ګډون د نړۍ له ټولو هېوادونو غواړو چې د سولې د خبرو اترو په برخه کې له موږ سره مرسته وکړي، ځکه چې موږ د نړۍ په نمایندګۍ د جګړې په لومړۍ کرښه کې یو او دوی ټول باید په رښتیني ډول هڅه وکړي چې په افغانستان کې تلپاتې سوله راشي.»
د ایران د بهرنیو چارو وزارت ویاند د دوشنبې په ورځ په یوه خبري کنفرانس کې وویل چې د افغانستان د سولې لپاره د امریکا تازه هلې ځلې په ډاګه کوي چې دغه هېواد په افغانستان او سیمه کې نور اهداف تعقیبوي او د سولې په مسئله کې جدي نه دی.
د ایران د بهرنیو چارو وزارت دا څرګندونې داسې مهال کړې چې په وروستیو کې امریکا په افغانستان کې د سولې لپاره هڅې ډېرې کړې دي. د سولې لپاره د امريکا د بهرنیو چارو وزارت ځانګړي استازي زلمي خلیلزاد په وروستیو کې کابل، اسلام اباد، ریاض او قطر ته جلا جلا سفرونه کړي.
د راپورونو په اساس د وسله والو طالبانو او افغان حکومت تر منځ د سولې د خبرو اترو پیل د خلیلزاد او پاکستاني او قطري چارواکو تر منځ د خبرو اصلي ټکي وو.
وسله والو طالبانو هم د یوې اعلامیې په خپرولو سره په لومړي ځل منلې چې په قطر کې د دې وسله والې ډلې یو شمېر استازو له خلیلزاد سره کتلي دي.
طالبانو ویلي چې په دې ناسته کې دواړو لورو هوکړه کړې چې د افغانستان د سولې په اړه به خبرو اترو او ناستو ته دوام ورکوي.
افغان حکومت هم هیله ښودلې چې ډېر ژر به له وسله والو طالبانو سره د سولې د خبرو اترو دروازه خلاصه شي.
په ورته وخت کې د افغانستان د سولې عالي شورا وايي د امریکا په ګډون د سولې له پروسې د یو شمېر ملاتړو هېوادونو رول په سوله کې رغوونکی دی او تر دې دمه يې په دې برخه کې عملي ګامونه هم اخیستي دي.
د دې شورا ویاند احسان طاهري ازادي راډيو ته ویلي: «د سیمې او نړۍ هېوادونو، په ځانګړي ډول د امریکا متحده ایالاتو د افغانستان د سولې د پروسې په اړه ښه ګامونه اخیستي دي او موږ هیله لرو چې دا اقدامات نور هم پیاوړي شي، همدا شان په دې برخه کې د نړۍ د هېوادونو په ځانګړي ډول د امریکا مرسته ډېره اړینه ده.»
د نړیوالو اړيکو کارپوه انتظار خادم وايي، امریکا بايد پر پاکستان له خپل نفوذه په استفادې سره طالبان د سولې د خبرو مېز ته کېنوې.
خادم په ورته وخت کې پر دې هم ټينګار کوي چې د سولې د خبرو مالکيت بايد له افغانانو سره وي او که امريکا په دې برخه کې ډېره ونډه اخلي، نو د افغان حکومت حاکميت ته زيان رسېږي چې په وينا یې بدې پايلې به ولري.
