حنيف اتمر: د ملي پوليسو اکاډمي دې د جنرال رازق په نوم ونومول شي

د هېواد د ملي امنیت پخوانی سلاکار وایي، د لوی کندهار او د افغانستان د بيلابيلو سيمو ځوانانو د ملي يوالي له حکومت، څخه غوښتي چې “د افغانستان د ملي پوليسو اکاډمي” د ستر جنرال شهيد عبدالرازق اڅکزي په نوم ونومول شي. یادو ځوانانو له اتمر سره په لیدنه کې دا غوښتنه کړې ده. نوموړي ویلي، دی د ځوانانو پرځای د هېواد د کورنيو چارو له وزارت څخه هيله کوي، چې دا وړانديز قبول کړي او د قانوني اجراتو له پاره يې زمېنه مساعده کړي. د اتمر پر رسمي فیسبوک پاڼه لیکل شوي، چې سترجنرال عبدالرازق اڅکزی د افغانستان واقعي اتل و، له هېواد څخه د دفاع مبارزه به يې زموږ په حماسي تاريخ کې تلپاتې شي. د سرچینې په وینا جنرال رازق د نيکمرغه افغانستان له پاره خپلې ارزوګانې قربان کړې. سرچینه وړاندې کاږي، د دې پر ځای غوښتنې په عملي کولو سره به د هېواد د يوه اصيل بچي او ساتندوی په توګه د سترجنرال شهيد عبدالرازق د حق په ادا کولو کې لومړنی ګام پورته شوی وي.