الجزیره: په وروستیو اونیو کې په افغانستان کې جګړې شدیدې شوې دي

الجزیره انګلیسي په یوه مطلب کې وایي چې په افغانستان کې طالبانو پر لا ډېرو سیمو کنټرول خپل کړی دی او د افغان حکومت پر ضد یې خپلې جګړې چټکې کړې دي. سرچینه زیاتوي سره له دې چې افغان حکومت طالبانو ته له کوم قید او شرط پرته د سولې وړاندیز کړی دی، خو دغه ډلې نه دی منلی او برعکس یې په خونړیو بریدونو لاس پورې کړی دی. په راپور کې راځي، دمګړی د افغانستان له ټولو ولسوالیو ۲۲۹ د افغان حکومت په لاس کې دي، چې ۵۶،۳ سلنه خاوره رانغاړي. همدا راز ۵۹ ولسوالۍ په بشپړه توګه د طالبانو په لاس کې دي او نږدې ۱۱۹ داسې ولسوالۍ هم شته چې نه د حکومت بشپړ کنټرول ورباندې شته او نه هم د طالبانو. د الجزیرې په راپور کې راځي له ټاکنو سره سم نا امنۍ هم اوج ته رسېدلي دي او ددغه سرچینې په وینا د ټاکنیزو کمپاینونو پر مهال نږدې ۱۰ نوماندان وژل شوي دي. الجزیره د افغانستان اوسنی وضعیت د اندېښنې وړ ښيي او د سولې هڅې هم تر دې دمه بې پایلې بولي.