کابل کې؛ خلک په کتارونو کې ولاړ دي، خو مرکزونه غیر فعال دي

د کابل په ډېری سیمو کې لا هم د رایې ورکولو مرکزونو خپل فعالیت نه دی پيل کړی. د راپورونو له مخې سره له دې چې د مرکزونو مخې ته سلګونه کسان په کتارونو کې ولاړ دي خو د ټاکنو کمیسیون کارکوونکو یې لا تر دې دمه خپل کار نه دی پيل کړی. د کابل ښار د پنځمې ناحیې کمپنۍ سیمې په قلعه کاشف ښوونځي کې سلګونه کسان د رایې ورکولو په کتارونو کې ولاړ دي، خو تر دې دمه دوی ته اولیه مواد نه دي رسېدلي. له سیمې خپلواک خبریال حبیب وقار سپوږمۍ راډیو ته وویل، چې نږدې دوه ساعته کېږي خلک په کتارونو کې ولاړ دي، خو داسې ښکاري چې حکومت په لوی لاس غواړي ټاکنې مختل کړي. دده په خبره سلګونه کسان د مرکزونو مخې ته په دې تمه ولاړ دي چې ژر به د رایې ورکولو بهیر پيل کېږي. هغه زیاتوي چې د پولیسو له لوري ډېر خلک بېرته کورونو ته شړل شوي دي. د کابل ښار په درېیمه برخه کې هم ډېری مرکزونه تر دې دمه غیر فعال دي او خلک د ټاکنو کمیسیون له دې چلند ناراضه دي. بل پلوی د کابل ښار په دشت برچي سیمه کې هم زرګونه کسان د رایې ورکولو مرکزونو ته په کتارونو کې ولاړ دي خو د رایې ورکولو پروسه لا نه ده پيل شوې. د سیمې خلک وايي چې بایومتریک هم کار نه کوي او د ټاکنو کمسیون کارکوونکي وايي چې دوی ددغه سیستم فعالېدو ته په تمه دي. د ټاکنو کمیسیون بیا وايي دوی هڅه کوي چې ټاکنې په سیمه توګه ترسره شي او د خلکو د ستونزو حل ته جدي پاملرنه کوي.