د ټاکنو کمیسیون کارکوونکو د نابلدتیا له امله ډېری مرکزونه لا هم غیر فعال دي. د ټولنیزو رسنیو کاروونکو او همدا راز د رایې ورکولو مرکزونو مخې ته ولاړ کسان وايي چې د ټاکنو کمیسیون کارکوونکي له سیستم سره نابلده دي او دې مسئلې سختې ستونزې جوړې کړې دي. ددوی په خبره د بایومتریک سیستم، د رایې ورکوونکو په لېستونو کې نیمګړتیا، د ټاکنیزو موادو کموالی او له بایومتیریک سیستم سره د ټاکنو کمیسیون کارکوونکو نه بلدتیا هغه ستونزه ده، چې ښایي ډېری وګړي د رایې ورکولو له حق محروم شي. بل پلو د کابل او ولایتونو ځینې اوسېدونکي وایي چې په ډېری برخو کې په لوی لاس په مرکزونو کې دغه ډول ستونزې جوړې شوې دي. یوه رایې ورکوونکي ایوب صابر پر خپله فیسبوکپاڼه لیکلي، په ډېری سیمو کې د ټاکنو کمیسیون په لوی لاس مرکزونه غیر فعال ساتلي دي او ډېری خلکو ته ویل شوي چې په سیستم کې ستونزه ده. دده په وینا ښايي ډېری سایټونه د ځینو سیاسي موخو او یا په دستوري توګه د ځانګړو کړیو له لوري غیر فعال ساتل شوي وي. سره له دې چې د ټاکنو کمیسیون د ستونزو د حل خبره کوي، خو لا هم ډېره برخه مرکزونه غیر فعال دي او لسګونه خلک په کتارونو کې د رایې ورکولو د پيل په تمه ولاړ دي.
