امریکا: له شمالي کوریا سره مو د خبرو هڅې پیل کړې دي

د امریکا د ملي امنیت سلاکار وایي، سپینې ماڼۍ له شمالي کوریا سره د خبرو هڅې پیل کړې دي او دوی تمه لري چې یاد هېواد بېرته د خبرو مېز ته راوګرځي. رابرټ اوبراین په خپله تازه مرکه کې ویلي، امریکا له بیلابیلو لارو شمالي کوریا ته پیغامونه استولي دي او د یاد هېواد له رهبر کېم جونګ اون څخه یې خبرو ته د بیا راګرځېدو غوښتنه کړې ده. اوبراین ویلي، د شمالي کوریا له لوري د کریسمس ډالۍ تهدید نه عملي کېدل مثبت کار دی او دا د دې ښکارندویي کوي چې یاد هېواد ممکن خبرو ته نرمښت وښیي. خو شمالي کوریا د ټرمپ له لوري د کېم جونګ اون د کالیزي مبارکۍ پیغام ته غبرګون کې ویلي، دا پیغام د خبرو پیل لپاره کافي نه دی. پیونګ یانګ ویلي، امریکا دې د دوی له غولولو لاس واخلي او په دې برخه کې دې خپله ژمنتیا ثابته کړي.