امریکا ایران ته خبرداری ورکړی چې له لاریونوالو سره تاوتریخوالی ورته د منلو نه دی.
دا په داسې حال کې ده چې د پرله پسې څلورمې ورځې لپاره په تهران کې د صنعتي شریف او امیر کبیر پوهنتونونه د سلګونو محصلانو د اعتراضونو شاهد وو چې د حکومت پر ضد یې شعارونه ورکول.
له دغو لاریونونو وروسته، په ټولنیزو شبکو کې هغه تصویرونه لاس په لاس کېږي چې ښيي پولیس او امنیتي ځواکونه د خلکو پر ضد له اوښکې بهوونکي ګاز او نظامي ځواک څخه کار اخلي، خو ایراني چارواکو ویلي چې له ځواک څخه یې کار نه دی اخیستی.
په ورته وخت کې د امریکا د بهرنیو چارو وزارت ویاندې مورګان اورتاګوس ایران ته خبرداری ورکړی چې هېواد به یې د ایراني لاریونوالو پر وړاندې تاوتریخوالی ونه زغمي.
هغه دغه راز زیاته کړې: «فکر کوم ډېره مهمه ده چې په یاد ولرو، دری- څلور ورځې مخکې، ایرانیانو ته د دوی د حکومت له خوا درواغ وویل شول، مخکې له دې چې ومني، دوی رښتیا هم د اوکراینۍ الوتکې د نسکورېدو مسوول دي».
دا په داسې حال کې ده چې د اوکراین د نړیوال هوايي شرکت یوه الوتکه د تېرې چهارشنبې په سهار په تهران کې د امام خمیني له نړیوال هوايي ډګر څخه تر پورته کېدو څو شېبې وروسته، د ایران د سپاه پاسداران ځواک له خوا په توغندي وویشتل شوه.
ایراني چارواکو له څو ورځني انکار وروسته د شنبې په ورځ ومنله چې دا الوتکه د دوی په پوځي توغندي په تېروتنه ویشتل شوې ده. د راپورونو له مخې، په دې پېښه کې د الوتکې ۱۷۶ سپرلۍ چې د شپږو هېوادونو وګړي وو، ټولې ووژل شوې.
په دې الوتکه کې ۷۶ ایرانیان، ۶۳ کاناډایان، ۱۳ افغانان، ۱۱ اوکراینیان، ۳ برېټانویان او ۳ سویډنیان سپاره وو، چې کیف ته روانه وه.
بلخوا د کاناډا د بهرنیو چارو وزیر ويلي، د افغانستان، اوکراین، برېټانیا او سویډن د بهرنیو چارو له وزیرانو سره چې وګړي یې د تهران د الوتکې په پېښه کې وژل شوي، د دې پېښې په بېلابېلو اړخونو بحث او خبرې کوي.
د کاناډا د بهرنیو چارو وزیر فرانسوا فلیپ شمپین د دوشنبې په ورځ وویل چې د دغو پنځو هېوادونو لوړپوړي ډیپلوماتان په لندن کې سره ګوري.
په ورته وخت کې د کاناډا لومړي وزیر جسټن تروډو ژمنه کړې چې د تهران د هوايي پېښې قربانیانو ته به انصاف برابروي.
په ورته وخت کې د دې پېښې په اړه د نړۍ په کچه غبرګونونه دوام لري او په تېرو ورځو کې یې د ایران زیات وګړي لارو کوڅو ته راوویستل.
