د ټاکنو کمیسیون: نن په ۴۰۱ مرکزونو کې ټاکنې ترسره کېږي

ټاکل شوې چې نن هم د کابل په ګډون په هغو ولایتونو کې ټاکنې ترسره شي، چې پرون مرکزونه پکې تړلي وو. د ټاکنو خپلواک کمیسیون رییس عبدالبدیع صیاد ویلي، چې نن به هم په هغو مرکزونو کې ټاکنې ترسره کېږي چې پرون ورته انتخاباتي مواد نه و رسېدلي، پکې ګڼه ګوڼه وه او یا همد تخنیکي ستونزو له امله تړل شوي وو. دده په وینا د هېواد په ۹۲ سلنه مرکزونو کې ټاکنې ترسره شوې دي خو یوازې اته سلنه مرکزونه پاتې دي چې نن به ټاکنې پکې ترسره کېږي. هغه د پرونیو ګډوډیو له امله له ولس بښنه غوښتې ده، خو ژمنه یې کړې چې هېڅوک به له خپل دغه مدني حق محروم نه کړل شي. بلخوا د ټاکنو پر کمیسیون ګڼې نیوکې موجودې دي. د ټاکنو په برخه کې فعال بنسټونه او ادارې وایي، چې د خلکو ګډون له اټکل ډېر و، خو د ټاکنو کمیسیون کمزوری مدیریت او بې غوري د زغملو نه وه. نن هم په ټول هېواد کې د ټاکنو لپاره عمومي رخصتي اعلان شوې ده او په ګڼو مرکزونو کې به ټاکنې ترسره کېږي. عبدالبدیع صیاد وایي، پرون په ټول هېواد کې ۴۵۰۰ د رایو مرکزونه خلاص او ۴۱۰ نور د امنیتي او تخنیکي ستونزو له امله تړلي وو. خو نن به د کابل د ۴۵ مرکزونو په ګډون په ۴۰۱ مرکزونو ټاکنې ترسره کیږي.