امریکایي تورپوستي ټرمپ یو متعصب شخص بولي

د یوې تازه نظرپوښتنې له مخې شاوخوا اتیا سلنه امریکایي تور پوستي ټرمپ یو متعصب شخص بولي او وایي، د نوموړي له واک ته رسېدو را وروسته په دې هېواد کې تور پوستي له ګڼو ستونزو سره مخ دي. دا نظر پوښتنه د واشنګټن پوسټ ورځپاڼې او د ایپسوس په نامه د نړیوالې بازار موندنې موسسې له لوري ترسره شوې ده. په دې نظر پوښتنه کې اتیا سلنه تور پوستو ویلي چې دوی د ټرمپ له ولسمشرۍ څخه خوښ نه دي ځکه چې په وینا یې؛ واک ته د نوموړي له رسېدو را وروسته په امریکا کې پر تور پوستو بریدونه هم ډېر شوي دي او د سپین او سور پوستو له لوري ورته په ښه سترګه نه کتل کېږي. خو ټرمپ بیا دا راپورونه رد کړي او زیاته کړې یې ده چې د ده په دوره کې له ټولو امریکایانو سره یو ډول چلند کېږي او په وینا یې نژاد او قوم نوموړي ته هیڅ مهم نه دي.