د ولسي جرګې د ټاکنو لومړۍ ورځ کابل او یوشمېر ولایتونه د ګڼو امنیتي پېښو شاهد و. په کابل او یوشمېر ولایتونو کې د ځای پرځای شویو چاویدونکو توکو، چسپکي او بمي چاودنو ترڅنګ پر انتخاباتي مراکزو ګڼ بریدونه ترسره شول، چې له امله یې یوشمېر ملکي کسانو ته مرګ ژوبله هم واوښته. خو د امنیتي ادارو مسئولان وایي، چې د ټاکنو ورځې امنیت لپاره یې د افغانستان په کچه ۷۰ زره امنیتي ځواکونه توظیف کړي او له وړو پېښو پرته سترې پېښې نه دي رامنځ ته شوي. طالبان وايي، چې د ټاکنو په ورځ یې ۱۶۶ بریدونه کړي دي. د ولسي جرګې د شنبې ورځې ټاکنې له کلکو امنیتي تدابیرو سره سره، د یوشمېر امنیتي پېښو سره یوځای ترسره شوې او د کابل په ګډون په ولایتونو کې یې خلکو ته مرګ ژوبله هم واړوله . له ډلې یې په ختیځو ولایتونو ننګرهار، لغمان او کونړ ولایتونو کې شاوخوا ۳۰ کسانو ته مرګ ژوبله اوښتې، چې ډیری مرګ ژوبله د ننګرهار په کوټ، سره رود او کوټ، د کونړ په مختلفو ولسوالیو کې هم شاخوا لسو کسانو ته مرګ ژوبله اوښتې. مرکز کابل چې د رایې ورکوونکو لپاره پکې کلک امنیتي تدابیر نیول شوي وو د څو چاودنو شاهد وو، د کابل ۱۵ حوزې اړوند خواجه بغرا سیمه کې یوه انتخاباتي مرکز ته څېرمه د ځای پر ځای شوو چاودیدونکو توکو د چاودنې له امله لسګونو تنو ته مرګ ژوبله واوښته.
