نیویارک ټایمز: د کمیسون نیمګړتیاوو هم خلک له رایې اچونې محروم کړي دي

د نړۍ ګڼو معتبرو ورځپاڼو د افغانستان ټاکنو ته کتنه کړې ده. نیویارک ټایمز ورځپاڼه پخپل یوه مطلب کې لیکي په افغانستان کې له لوړو امنیتي تهدیداتو سره سره خلکو په ټاکنو کې برخه واخیسته. د ورځپاڼې په خبره افغانانو د وسله والو طالبانو هېڅ ډول تهدید ته توجه و نه کړه او له سلګونه امنیتي پېښو سره سره یې په پوره زړه ورتیا په ټاکنو کې برخه واخیسته. ورځپاڼه وایي که له یوې خوا امنیتي تهدیدات ډېر وو، خو له بلې خوا په ټاکنو کمیسیون کې ځینو ګډوډیو هم ډېر خلک له رایې اچونې محروم کړل. ګارډين ورځپاڼې هم د ټاکنو په اړه مطلب لیکلی دی. ورځپاڼه لیکي په ټاکنو کې د بایومیتریک سیستم کارول نوې خبره وه او د ټاکنو کمیسیون کارکوونکي ورسره نابلده وو. د سرچینې په خبره په ډيری مرکزونو کې خلک غوسه شوي وو او هڅه یې کړې وه دغه سیستم مات کړي او خپلې رایې وکاروي. ورځپاڼه پر ټاکنو کمیسیون نیوکه کوي چې باید تر هر څه وړاندې یې ځان له خپل کار او سیستم ډاډه کړی وای بیا یې خلک رایې اچونې ته رابللي وای.