د چين ولسمشر شي جېن پېنګ ویلي چې په دغه هېواد کې د کرونا ويروس د خپرېدو له کبله وضعيت ترینګلی شوی دی.
دا په داسې حال کې ده چې د کرونا ویروس لومړۍ پېښه د چین د هوبای ولایت په مرکز ووهان ښار کې ثبت شوې ده.
د چين ولسمشر د واکمن کمونيست ګوند د مشرتابه په غونډه کې ويلي، چين په چټکۍ د کرونا ويروس د خپرېدو له کبله له ناوړه وضعيت سره مخ دى.
د راپورونو له مخې، د دې ويروس له کبله په چين کې لږ تر لږه ۵۶ کسان مړه شوي او ١٩٧٥ تنه نور ورباندې اخته شوي دي. د دغه هېواد چارواکو ويلي چې ډېرى مړه شوي کسان تر پنځوسو کلونو لوړ عمرونه لري.
د چين ولسمشر شي جېن پېنګ چې هڅه کوله د خپل هېواد وګړي ارام کړي، زياته کړې: «موږ به يقيناً وکولاى شو چې د دې ستونزې پر وړاندې مبارزه وګټو.»
په ورته وخت کې د امريکا د بهرنيو چارو وزارت هم ويلي هڅې یې پیل کړې څو د کرایي الوتکې له لارې په ووهان کې د خپلې کونسلګرۍ کارکوونکي انتقال کړي.
دا په داسې حال کې ده چې تر اوسه په کرونا ويروس د مړينې ټول خبرونه له چين څخه ورکړل شوي، خو په ورته وخت کې د هغو هېوادونو شمېر هم په زياتېدو دى چې پر دغه ويروس د خلکو د اخته کېدو پېښې په کې ثبت شوې دي.
په امریکا، کاناډا، اسټراليا، فرانسه، جاپان، ماليزيا، جنوبي کوريا، تايوان، ټايلنډ، ويتنام، سعودي عربستان، سينګاپور او د چين په قلمروونو هانګ کانګ او ماکاو کې هم د دې ناروغۍ پېښې ثبت شوې دي.
ډاکترانو ویلي چې دغه ويروس د کرونا ويروس د پراخې کورنۍ يوه برخه ده، چې په ځينو مواردو کې خفيف علايم لري او په ځينو نورو مواردو کې د والګي په بڼه راڅرګندېږي، چې ټوخى او تبه هم ورسره وي. په سختو حالاتو کې ويروس د انسان د ساه لنډۍ سبب کېږي، د سينه بغل په بڼه هم پرمختګ کوي، چې د انسان د مړينې سبب کېږي.
