کله ناکله هغه وخت ډېر خوند کوي چې د خپل ژوند د شریک حسادت ووینی، ځکه تاسو ته دا احساس درکوي، چې هغه واقعاً درسره مینه لري، ورته مهم یاست او له دې وېرېږي چې خدای مه کړه، له لاسه مو ور نه کړي. د چا نه خوښېږي چې دا ډول ښه احساس تجربه کړي؟
خو په یوه اړیکه کې له بریده ډېر حسادت اصلاً ښه او سم نه دی، ځکه د یوه کینهکښ انسان په وجود کې د نهباورۍ د احساس ښکارندویي کوي.
ښایي په یوه مینهناکه اړیکه کې حسادت په زړهپورې تر سترګو شي، خو دا چې وغواړی تل له یو بل سره واوسی (ګواکې ټوله دنیا مو په مقابل لوري کې خلاصه شوې ده، یا برعکس) په اوږد مهال کې به بدې پایلې ولري.
اوس له کومه ځایه پوهېدای شی، چې د ژوند د شریک حسادتونه مو ناسالم دي؟ له کومه ځایه پوهېږی، چې د ژوند د شریک په اړه مو حسادتونه سالم یا ناسالم دي؟ آیا ځانګړې نښې نښانې لري؟ آیا فکر کوی چې ستاسو حسادتونه طبیعي دي؟
آیا خوښېږي مو چې د اونۍ اووه ورځې او شپه او ورځ ۲۴ ساعته د خپل ژوند له شریک سره واوسی؟
هو دا طبیعي ده چې د خپل ژوند له شریک سره نه یاست، خپه کېږی، خصوصاً که چېرې مو دا عادت ګرځېدلی وي چې تل له یو بل سره واوسی، خو که زړه مو غواړي چې د ژوند شریک مو یوازې او یوازې له تاسو سره وي او ستاسو له اړیکې څخه بهر هېڅ وخت تېر نه کړي، دا بیا توپیر کوي.
که مو د ژوند شریک یوازې د خپل ځان لپاره غواړی او خوښېږي مو نه چې هغه خپله نړۍ کشف کړي، نو مینه مو ځان غوښتونکې ده، ځکه وېرېږی چې له لاسه یې ور نه کړی، له دې امله تر کومه ځایه چې شونې ده، نو محدودوی یې. رښتینی مین، خپله مینه او معشوقه آزاده او خپلواکه پرېږدي چې خپل ځان وروزي، خپل خوبونه وڅاري او له نویو انسانانو سره آشنا شي، که په پای کې مو مینه بیا هم له تاسو سره پاتې شي، نو خپله مینه یې تاسو ته ثابته کړې ده.
هره دقیقه چې له یو بل سره نه یاست، نو هغه چک کوی.
دا چې د ژوند شریک مو تر څنګ نشته، نو تل هغه ته زنګ ووهئ، یا پیغام ور استوئ، دا هم د یوه ناسالم حسادت بله نښه ده. که ټاکل شوې وي هر وخت چې مو د ژوند شریک د سترګو پر وړاندې نه دی، پر وېره او خپګان اخته شی، یانې واقعاً پر هغه باور نه لری، دا چلند ستاسو روغتیا ته هم زیان رسوي، ځکه تل خواشيني یاست او اروایي فشار لری.
که داسې عادت شوي یاست چې د خپل ژوند د شریک د ټولو فعالیتونو په اړه له هغه څخه پوښتنه وکړی او پرې پوه شی، نو ډاډه اوسی چې ډېر ژر به داسې وخت را ورسېږي، چې هغه ستاسو له دې چلنده ستړی شي، که په پای کې یې دا تصمیم ونیو چې خوشي مو کړي، نو ګرم تاسو یاست.
اجازه نه ورکوی چې د ژوند شریک مو له خپلو دوستانو سره بهر لاړ شي
که خوښېږي مو نه چې د ژوند شریک مو له خپلو دوستانو سره وګوري، ځکه له دې څخه وېرېږی چې د یوه بل کس تر څنګ په اوسېدلو ښې شېبې تېرې کړي، نو واقعاً کینهکښ یاست.
آیا ستاسو خوښېږي چې د ژوند د شریک په غوښتنه او یا هم د هغه په جبر، له خپلو دوستانو سره لیده کاته ونه کړی؟ ډاډه «نه» ویلی شم.
که تاسو اجازه ونه لری چې خپل دوستان وګوری، نو هرو مرو بد احساس کوی، خصوصاً که پوه شی چې دوستان مو هېڅ ستونزه او نیمګړتیا نه لري.
په ټولنیزو رسنیو کې د خپل ژوند د شریک فعالیتونه کنټرولوی
هو دا ډېره ښه ده، چې تاسو او د ژوند شریک مو د خپل اکونټ په پټ نومونونو (پسورډونو) باندې پوه شی، چې ستاسو تر منځ کوم څه پټ پاتې نه شي، خو هغه څه چې ښه او سم نه دي، په پټه په ټولنیزو رسنیو کې د خپل ژوند د شریک د فعالیتونو چک کول دي. د بېلګې په ډول، دا چې هغه څوک څاري (فالو کوي)، کومې ځړونې خوښوي (لایک کوي) یا څه ډول کمینټونه پرېږدي.
که دا ډول کارونه کوی، نو باید پر دې پوه شی چې بېباورۍ درباندې غلبه کړې ده.
باید له خپل دې چلنده ډډه وکړئ، ځکه ستاسو ذهن له شک، تردید او کینې څخه ډکوي او اړیکې ته به مو ډېر زیات زیان ورسوي.
پر هر هغه چا شک لری، کوم چې ستاسو د ژوند د شریک پر ځړونو کمینټ کوي او په اړه یې پلټنه کوی
ستاسو دا ځانګړتیا هم د تېر مورد غوندې د بېباورۍ او بدګومانۍ نښه ده، کله چې د هر هغه چا په اړه چې ستاسو د ژوند د شریک پر ځړونو کمینټ کوي او یا هغه لایک کوي، پر بدګومانۍ اخته کېږی او په اړه یې پلټنه کوی، نو یانې باوري یاست چې د ژوند شریک مو درسره خیانت کوي، تاسو له هر هغه چا سره کینه او حسادت کوی چې ستاسو د ژوند له شریک سره تعامل لري.
البته دا ډېره ښه ده چې ښه آګاهانه مهارتونه ولری او ځیرکتیا مو ډېره زیاته وي، چې زیان ونه وینی او دوکه نه شی، خو که چېرې مو د ژوند شریک په حقیقت کې درسره ژمن او وفادار وي څنګه؟ په دې صورت کې مو خپله انرژي بېځایه لګولې ده.
تل د خپل ژوند شریک پر خیانت تورنوی
که نه شی کولای، چې خپله مخه ونیسی او د خپل ژوند شریک پر خیانت تورنوی، نو دا ښکاره کوی چې کینهکښه یاست، که تل د خپل ژوند د شریک پر وفادارۍ باندې شک کوی، نو پر سالمې اړیکې نه شی پوهېدای.
بېباوري د یوې ناسالمې او نه پایښت لرونکې اړیکې نښه ده، په حقیقت کې کله چې ډاډ نه وی، نو مینه او لېوالتیا هم نشته، ځکه که د خپل ژوند پر شریک باور نه شی کولای، باید له خپله ځانه وپوښتئ، آیا اوس مو هم خوښېږي چې دې اړیکې ته دوام ورکړی؟
د ژوند شریک مو اجازه نه لري چې له تاسو پرته کوم ځای ته لاړ شي او یا هم تفریح وکړي
که د ژوند شریک ته اجازه نه ورکوی چې له تاسو پرته کوم ځای ته لاړ شي، نو ښکاره ده چې کینهکښه او بېباوره یاست. ستاسو دا کار د دې ښکارندویي کوي چې پر خپل ځان هم بېباوره یاست، په همدې دلیل وېرېږی چې د ژوند شریک مو له تاسو پرته، بل ځای خوشاله وي او ښایي بېرته تاسو ته را ونه ګرځي، دا ستونزه مو نه یوازې اړیکه له منځه وړي، بلکې د هغې ریښې په مرسته چې ستاسو د ننه یې لري، پر ځان باور مو له منځه وړي.
کله مو چې د ژوند شریک درسره نه وي، تل ورسره اړیکه ټینګوی څو وګوری چېرته او له چا سره دی
آیا هر کله چې د ژوند شریک مو له تاسره نه وي، پر اروایي فشار اخته او ناکراره کېږی؟ که چېرې دا چک وکړی چې د ژوند شریک مو چېرې او له چا سره دی، نو کینه کښ انسان یاست، تر ټولو بده دا چې د خپل ژوند له شریک څخه وغواړی، څو یې درته ثابته کړي چې همدا اوس چېرې دی او څه کوي، تر هر څه ژر خپل دا عادت پرېږدئ، څو داسې یوه ورځ را ونه رسېږي چې د ژوند شریک مو تاسو پرېږدي او حیران شی.
څنګه خپل ناسالم حسادت پرېږدی؟
که څه هم داسې لږ حسادت کولای شي، اړیکه مو هیجاني او توده کړي، خو له بریده زیات حسادت سر خوږی جوړوي او په اړیکه کې مو د ناسم پوهاوي، جګړې، شخړې او ستړیاوو د رامنځ ته کېدو سبب ګرځي؛ له دې امله باید داسې لارې چارې پیدا کړئ، څو ناسالم حسادت پرېږدی او د خپل ژوند له شریک سره ښه او سالمه اړیکه ټینګه کړی.
دا ومنئ چې کینهکښه یاست
کله ناکله افراد له دې څخه انکار کوي، چې کینهکښ دي او نه غواړي چې خپله دا بده ځانګړتیا ومني، ځکه نه غواړي چې کمزوري تر سترګو شي، خو تاسو باید پوه شی چې څه احساسات لری، ښایي وکولای شی په موقتي ډول خپل د نننی احساس نالیدلی ونیسی، خو تل به پر دې چارې بریالي نه شی، بالاخره په یوه نه یوه ځای کې مو کنټرول له لاسه وځي، نو له خپل ځان سره رښتیني واوسئ او دا ومنئ چې له ناسالم حسادت سره لاس و ګرېوان یاست.
د خپل حسادت پر پټو دلایلو پوه شئ
کله مو چې ومنله چې پټ حسادت لری، نو وخت یې را رسېدلی دی چې هغه لاملونه پیدا کړی، چې تاسو یې پر دې سخت حسادت باندې اخته کړي یاست. د بېلګې په ډول، آیا کینهکښ یاست، ځکه چې خاوند مو له مخالف جنس څخه ډېرې زیاتې همکارانې لري؟ آیا د حسادت دلیل مو دا دی چې خاوند مو له ټولو سره ښه او صمیمي چلند کوي؟ یا ښایي داسې احساس کوی چې خاوند مو ډېر جذاب او د پام وړ دی او تاسو د هغه په اندازه جذابه نه یاست؟ لومړی د خپل حسادت دلیل پیدا کړئ چې وکولای شی وروستی ګام پورته کړی.
خپل احساسات څرګند کړئ
که خپل احساسات پېژندلای شی، نو په اړه یې د خپل ژوند له شریک سره خبرې کولای شی، کله چې خپل احساسات څرګندوی، نو آرامه او هوسا واوسئ چې ناسمپوهاوی رامنځ ته نه کړی، یا قضیه لا پسې پېچلې نه شي. که خپل احساس په سمه توګه څرګند نه کړی، ښایي د ژوند شریک مو فکر وکړي چې بې منطقه یاست، په هر حال د حسادت دلیل مو چې هرڅه وي، باید وکولای شی په اړه یې په سمه توګه خبرې وکړی او یو بل ته په ښه توګه غوږ ونیسی، چې یوې پایلې ته ورسېږی.
د هغو څیزونو په اړه چې خواشیني کوي مو، له یو بل سره خبرې وکړئ او یوې هوکړې ته ورسېږئ.
که له دې څخه خواشیني یاست چې ولې مو د ژوند شریک له خپلو مخالف جنس همکارانو سره خبرې کوي او ورسره لیده کاته لري، نو اړتیا لری چې پر دې باندې له یو بل سره هوکړې ته ورسېږی، چې په اړیکه کې کوم څیزونه منی او کوم نه منی. نرمښت او انعطاف د دواړو لوریو له خوا اړین دی.
