سعودي: د بیت المقدس په اړه زموږ دریځ پخوانی دی

د سعودي عربستان پاچا ملک سلمان بن عبدالعزیز ویلي چې د فلسطین، ځانګړې توګه د بیت المقدس په اړه د دوی دریځ پخوانی دی او لکه څنګه چې یې ویلي وو، بیت المقدس د مسلمانانو لومړنۍ قبله ده او د دوی خپل حق جوړېږي. نوموړي د فلسطین د خپلواکې ادارې له مشر محمود عباس سره په ټلیفوني خبرو کې ویلي، بیت المقدس د ټولو مسلمانانو مسئله ده او د هغه په اړه یو طرفه پرېکړه هیچاته هم د منلو نه ده. سلمان ویلي، دوی له ټرمپ څخه هم غواړي چې په دې اړه پر خپل دریځ له سره غور وکړي. هغه ویلي، سعودي به تل د فلسطین تر څنګ ولاړ وي او هیچا ته به یې پر حق د تېري اجازه ورنکړي. د یادونې ده چې ټرمپ پرون په رسمي توګه بیت المقدس د اسراییلو د پلازمینې په توګه اعلان کړی دی.