د ټاکنيزو شکايتونو کمېسيون وايي، شاوخوا ۵۰۰۰ ټاکنيزې سرغړونې يې ثبت کړې دي.
د دغه کمېسیون چارواکي وايي چې ډېر ژر به د ثبت شوي شکايتونو د څېړنې بهير پيل کړي.
د ټاکنيزو شکايتونو کمېسيون غړي او ویاند علي رضا روحاني پرون يوه خبري کنفرانس ته وویل، په زرګونو ټاکنيزې سرغړونې يې ثبت کړې چې ډېری يې په کابل کې شوې دي.
نوموړي زیاته کړې: «زموږ سره زرګونه ستونزې او شکایتونه ثبت شوي دي چې یوه برخه کې د رایې ورکونې بهیر ته د څارونکو نه پرېښودل دي، زموږ پرېکړې وروسته کېږي چې مجازات به هم ولري، زموږ غوښتنه له خلکو څخه دا ده چې هر وګړی د یو څارونکي حیثیت لري، موږ ته دقیق راپور راکړي، ټولو ته به رسېدنه وشي».
د ټاکنيزو شکايتونو کمېسيون چارواکي وايي چې خلک تر ۴۸ ساعتونو پورې د شکايتونو د ثبتولو لپاره وخت لري او په وينا يې چې دوی يوازې هغو شکايتونو ته رسيده ګي کوي چې مؤثق وي او اثباتيه مدارک ورسره مله وي.
د افغانستان د ازادو او عادلانه ټاکنو د بنسټ مشر يوسف رشيد وايي، د ټاکنو په پروسه کې ځينې ستونزې وې چې په وينا يې دوی يې وړاندې خبرداری ورکړی و.
رشيد وايي، د ټاکنيزو شکايتونو کمېسيون مسووليت دی چې شکایتونو ته په پوره شفافیت رسېده ګي وکړي، ترڅو عدالت تامین شي: «موږ په دې پوهېږو چې له بده مرغه په دې بهیر کې ډېرې ستونزې وې او واک د کمېسیون له لاسه وتی و، که چېري بهیر هم اوږدېږې زموږ غوښتنه داده چې عدالت تامین شي، له شکایتونو کمېسیون څخه زموږ غوښتنه دا ده چې ټولو خواوو ته ځواب ورکوونکی وي».
رشيد د ټاکنيزو شکايتونو د کمېسيون پر بې پرې والي هم ټينګار کوي او وايي چې د خلکو ټولو شکایتونو، اعتراضونو او راپورونو ته باید په دقت رسېده ګي وکړي.
د یادونې ده چې د ولسي جرګې په ټاکنو کې نږدې ۹ میلیونه افغانانو، نومونه ثبت کړي وو چې د ټاکنو په لومړۍ ورځ تر دريو ميليونو ډېرو کسانو پکې ګډون وکړ.
د ټاکنو خپلواک کمېسیون وايي چې د ټاکنو وروستۍ پايلې به د ليندۍ په مياشت کې اعلان کړي.
