یوه متقاعد امریکایي جنرال ګري هارل دې هېل خپرونې ته ليکلي چې د شمالي کوریا او ځينو نورو هېوادونو پر وړاندې د ټرمپ اقداماتو ته په کتو، نوموړی د افغانستان د جګړې د پای ته رسولو وړتيا هم لري.
هارل ويلي چې له ټرمپ پرته به ښايي بل څوک د دې جوګه نه وي چې په افغان جګړه کې بريا خپله کړي.
د دغه امريکايي جنرال په باور، چې په افغانستان کې د کار پوره تجربه لري، د افغانستان جګړه ډېر خونړي حالت ته ننوتې ده. هارل وايي، له دې ټولو سره سره ټرمپ د سکاټ مېلر په ګومارلو سره د افغان جګړې د ګټلو لپاره غوره ګام پورته کړی دی.
نوموړي سکاټ مېلر یو پیاوړی نظامي یاد کړی او په وینا یې که له نوموړي سره د جګړې په ډګر کې همغږي وشي نو ښایي، له کنټروله وتونکې دا جګړه کنټرول کړي او دغه راز يې د اوږدېدو مخه ونيسي.
نوموړي دا هم ویلي چې د سکاټ مېلر او افغان ولس تر منځ هم د اړیکو یوه پیاوړي مزي ته اړتیا ده، څو له افغانانو سره په سلا او مشوره دغه جګړه پای ته ورسول شي.
د دغه امريکايي جنرال څرګندونې په داسې حال کې دي چې په وروستيو کې امريکا تازه د افغان سولې په پروسه کې کليدي رول خپل کړی او د افغان سولې لپاره د امريکا د بهرنيو چارو وزارت استازي زلمي خليلزاد پر ځينو مواردو له طالب چارواکو سره هوکړه کړې ده. د خليلزاد او طالب چارواکو تر منځ يوه شوې هوکړه دا هم ده چې د سولې خبرو ته به دوام ورکوي.
په ورته مهال ځينې راپورونه بيا وايي چې ولسمشر محمداشرف غني د افغانستان د سولې په پروسه کې د امريکا پر رول ناخوښ دی او وايي چې د طالب او امريکايي چارواکو د خبرو دوام د افغان حکومت د منزوي کېدو سبب کېږي.
