د بلخ سيمه ييز چارواکي وايي چې د دغه ولايت په نهرشاهي ولسوالۍ کې د نوماند اسرار تاشقرغاني څلور ناظرين وژل شوي دي.
د بلخ د ولايتي شورا رييس افضل حديد پرون رسنيو ته ويلي چې دغه کسان وړمه شپه وژل شوي دي.
نوموړي زياته کړې چې وژل شوي څلور ځوانان دي او له بلخ ولايته ولسي جرګې ته د نوماند اسرار تاشقرغاني ناظرين وو.
حديد زياتوي چې ياد کسان د نهرشاهي ولسوالۍ افغانيه ښارګوټي ته د نظارت لپاره تللي وو او د بېرته راتګ پر مهال يې لار ورکه کړې وه.
د هغه په خبره، وژل شوي کسان لومړی تښتول شوي او بيا د شپې وژل شوي او موټر يې ترې بېول شوی دی.
د حديد په خبره، ياده سيمه د وسله و الو مخالفينو تر کنټرول لاندې وه او ګومان کېږي چې دغه کسان به هم طالبانو وژلي وي.
د بلخ امنيه قوماندان محمد اکرم سامع هم د څلورو کسانو وژل کېدل تاييدوي، خو وايي چې څېړنې يې لا هم روانې دي او معلومات به وروسته له رسنيو سره شريک کړي.
ولسي جرګې ته نوماند اسرار تاشقرغاني لا په دې اړه څه نه دي ويلي.
د طالبانو وياند ذبيح الله مجاهد ويلي، چې په دې پېښه کې دوى لاس نه لري او د پېښې مسووليت هم تر اوسه کومې ډلې پر غاړه نه دی اخيستی.
