پر ټاکنو د څار ادارې وايي، د يکشنبې په شپه په ټاکنيزو مرکزونو کې د رايو صندقونو پرېښودل د اندېښنې وړ دي او دغه راز په ځينو محلونو کې رايې د ناظرينو له شتون پرته شمېرل شوې دي.
د افغانستان د عادلانه او رڼو ټاکنو بنسټ يا فيفا رييس يوسف رشيد وايي، په ټاکنيزو مرکزونو کې د بندو صندوقونو پرېښودل ښايي درغليو ته لاره هواره کړي.
دى زياتوي: «همدا د اندېښنې وړ مسئله ده چې بند صندوقونه د رايې مرکزونو کې پرېښودل شول. زموږ د معلوماتو پر اساس، په ځينو د رايې مرکزونو کې د څارونکو په نه شتون کې هم رايې شمېرل شوې دي».
د شفافو او عادلانه ټاکنو بنسټ (ټيفا) رييس محمد نعيم ايوب زاده هم وايي، د رايې ورکولو ځینو مرکزونو کې هغه صندوقونه چې وړمه شپه پاتې شوي، د څارونکو په نه شتون کې يې شمېرنه شوې ده.
دى وايي: «ټاکنو کمېسيون به څنګه ثابته کړي چې درغلي نه ده شوې. د رايې په هغو مرکزونو کې چې تېره شپه پکې بند صندقونه پرېښودل شوي، د ممکنه درغليو لپاره د موکې برابرېدو په معنا ده».
ايوب زاده په دې تړاو د ژورې اندېښنې په څرګندولو سره يادونه کړې چې د ټاکنو د څرنګوالي په اړه به ژر خپل بشپړ راپور خپور کړي.
خو د ټاکنو خپلواک کمېسيون د وياند مرستيال ذبيح الله سادات پژواک ته ويلي، په ټولو مرکزونو کې رايې شمېرنه د څارونکو په شتون کې شوې ده.
ده زياته کړې: «هېڅ صندوق په خپل سر نه دی خلاص شوی، هر صندق لاک درلود، د خلاصېدو پر مهال يې د څارونکو لاسليک اخيستل شوی او بيا يې شمېرنه شوې ده».
د نوموړي په وينا، د هغو مرکزونو چې بند صندوقونه پکې پاتې شوي، په سمه توګه ساتنه شوې ده او د ده په خبره په دې تړاو اندېښنې له وخته مخکې دي.
