طیب اغا: طالبانو ته د امیرالمومنین او اسلامي امارت کلمو کارول جواز نه لري

پخواني طالب چارواکي او د طالبانو پخواني مشر ملا محمد عمر ته نږدې کس سید طیب اغا ویلي، طالبانو ته دا جواز نشته چې د امیرالمومنین او اسلامي امارت کلمې وکاروي. نوموړي د قطر دفتر ته یو لیک لیکلی دی او دغه لیک د رسنیو لاس ته لوېدلی دی. په لیک کې د اتو مواردو په اړه د طالبانو اوسني مشر ملا هبت الله ته سپارښتنه شوې ده. طیب اغا زیاتوي طالبان له پاکستان په افغانستان کې فعالیتونه ترسره کوي، خلکو ورسره بعیت نه دی کړی، په ډېری سیمو کې په زور له خلکو مالي مرستې ټولوي، نو له دې امله دوی ته ددې جواز نشته، چې ځان ته اسلامي امارت ووايي، ځکه اسلامي امارت باید مشخصه جغرافیه ولري او د یوه هېواد مرکز ددوی په لاس کې وي. همدا راز دا چې خلکو له ملا هبت الله سره بعیت نه دی کړی، نو ده ته د امیرالمومنین لقب کارول هم مناسب نه دي. هغه همدا راز ویلي، چې طالبان دې بهرني جنګیالي له لیکو وباسي، په جوماتونو کې دې وژنې نه کوي، په زور دې له خلکو مالي مرستې نه اخلي، له پاکستان دې ددوی مشران ووځي، خپل تحریک ته دې تګلاره جوړه کړي او د قطر دفتر ته دې بشپړه ازادي او خپل رول ورکړي. وسله والو طالبانو بیا تر دې دمه ددغه لیک په اړه څه نه دي ویلي.