احزاب: د ټاکنو پروسه د کمېسیون له کنټرول څخه وتلې وه

سیاسي احزاب وایي، چې د ټاکنو پروسه د کمېسیون له کنټرول څخه وتلې وه. احزاب وایي، حکومت او کمیسیون که څه هم د پارلماني ټاکنو شفافیت په هدف د بایومتریک سېستم په شمول ځینې اسانتیاوې رامنځته کړې وې، خو د تمې خلاف ټاکنیزو کمیسیونونو بیا یاده پروسه په سمه توګه کنټرول نه شوای کړای. په ورته مهال د ټاکنو خپلواک کمیسیون پخواني چارواکي وایي، سره له دې چې کمیسیون ته ټول امکانات ورکړل شوي و، خو د یادې پروسې په کنټرول کې پاتې راغلل. په هیواد کې د ناسم امنیتي وضعیت او د ټاکنو ترسره کېدو په تړاو له بې باوریو سره سره د ۱۳۹۷ کال ټاکنې ترسره شوې، خو پکې د درغلیو او تخطیو شکایتونه پرځای دي. سیاسي احزاب وایي، حکومت او کمیسیون که څه هم د پارلماني ټاکنو شفافیت په هدف د بایومتریک سېستم په شمول ځینې استاوې رامځ ته کړې، خو په شفافه توګه ددې پروسې په ترسره کولو کې پاتې راغلل او په دې پروسه کې د موجودو ستونزو له امله خلک په انتخاباتو کې له رای اچونې محروم شول. د افغانستان د نجات ملي جبهه وایی، سربیره پر دې، چې د حکومت او کمیسیون له لوري د بایومتریک سېستم په شمول د احزابو یوشمیر وړاندیزونه هم ومنل شول، خو د ټاکنو خپلواک کمیسیون د تمې خلاف د ټاکنیزې پروسې لپاره خپل کارکوونکي په سمه ټوکه ونه روزل. بلخوا د ټاکنو خپلواک کمیسیون پخواني چارواکي وایي، چې کمیسیون ته ټولې هغه اسانتیاوې، چې امنیت او بودیجه هم پکې راځي، د حکومت له لوري برابر شوي وو، خو د کمیسیون مسولان بیا هم د ټاکنیزې پروسې په کنټرول کې پاتې راغلل. د ټاکنو خپلواک کمیسیون رئيس په دې پروسه کې ستونزې مني، خو وایي، چې بایومتریک سېستم، چې په دې پروسه کې د لومړي ځل لپاره استفاده شو، پر دوی تپل شوی وو، چې له امله یې ګڼې ستونزې رامنځته شوې. په پارلماني ټاکنو کې د درغلو په تړاو د احزابو او سیاستوالو اندېښنې داسې مهال دي، چې د ټاکنو دویمه ورځ هم له درغلیو او ستونزو ډه وه.