د رسنیو د راپورونو له مخې د ولسمشر یوه سلاکار شفیق همدم له رسنیو سره په خبرو کې دا منلې ده، چې د طالبانو یو پیاوړی او د نفوذ لرونکی کس ملا برادر د پاکستاني حکومت له بنده خوشی شوی دی. څو ورځې وړاندې په رسنیو کې داسې راپورونه خپاره شوي چې ګواکي د طالبانو د پخواني مشر ملا عمر مرستیال ملا برادر په پاکستان کې د ای ایس ای له بنده خوشی شوی دی. ویل کېږي چې د هغه خوشي کول د سولې له خبرو سره په اړیکه کې دي. تر دې دمه پاکستاني حکومت او یا هم طالبانو په دې اړه څه نه دي ویلي. ملا برادر د طالبانو په لیکو کې او ددغه ډلې د واکمنۍ پر مهال یو پیاوړی او پراخ نفوذ لرونکی کس و. هغه لس کاله وړاندې د پاکستاني استخباراتي ادارې یا ای ایس ای ونیو او ددغه ادارې په بند کې و. پخواني ولسمشر حامد کرزي په ځلونو د ملا برادر د خوشي کولو غوښتنه وکړه، خو پاکستان دغه غوښتنه ردوله. اوس ویل کېږي چې پاکستان د امریکا په غوښتنه ملا برادر خوشی کړی دی.
