د ټاکنو کمیسیون خبرداری: نوماندان دې ژر تر ژره خپل تبلیغات او انځورونه ټول کړي

نوماندان دې له ښارونو خپل انځورونه او تبلیغات ټول کړي. د ټاکنو خپلواک کمیسیون وايي نوماندانو ته یې خبرداری ورکړی چې ژر تر ژره دې له ښارونو خپل تبلیغات او انځورونه ټول کړي. ددغه کمیسیون رییس عبدالبدیع صیاد نن په یوه خبري غونډه کې د خبرو پر مهال وویل، نوماندان اړ دي چې خپل تبلیغات ټول کړي او د ښار په پاکولو کې ونډه واخلي. دده په خبره که نوماندان خپل انځورونه ټول نه کړي او خپلې تبلیغاتي لوحې لرې نه کړي نو ټاکنیزه سرغړونه ګڼل کېږي او له دغه نوماندانو سره به قانوني چلند کېږي. هغه ویلي د ټاکنو کمیسیون به سرغړوونکي نوماندان نقدي جریمه کړي او همدا راز به یې دې ته اړ کړي چې خپل انځورونه او تبلیغات ټول کړي. په تېرو شل ورځنیو ټاکنیزو کمپیاینونو کې د هېواد د ټولو ښارونو بڼه اوښتې ده. ښاریان د نوماندانو له دغه چلند سرټکوي او په خبره یې نوماندانو په خپلو انځورونو او تبلیغاتو ښارونه ککړ کړي دي او بېرته یې باید په پاکولو کې مرسته وکړي.