ولسمشرۍ ماڼۍ وايي، د سولې د بین الافغاني مذاکراتو د پیل لپاره د افغان حکومت او امریکا هڅې بې ساري دي.
د ولسمشرۍ ماڼۍ ویاند محمد هارون چخانسوري وايي، که څه هم د سولې د خبرو په اړه تازه پرمختګ نه شته، خو حکومت هیله مند دی چې ډېر ژر له طالبانو سره مستقیم مذاکرات پیل شي.
چخانسوري وايي: «کوم جدیت چې د سولې په پروسه کې موجود دی، حکومت او خلک یې په کلکه غواړي، د امریکا په ګډون د افغانستان ټول متحدین په جدي توګه کار کوي، دا کار بې سابقې دی، همکاران له افغان حکومت سره په همغږۍ کې د بین الافغاني مذاکراتو د پیل لپاره کار کوي، هیله مند یو چې مثبته نتیجه ورکړي».
د ده په خبره، حکومت چمتو دی چې له طالبانو سره له پاکستانه پرته په هر ځای او هره کچه چې وي، مستقیمې خبرې وکړي.
طالبانو تازه د افغان حکومت د دغه دريځ په اړه څه نه دي ويلي، خو پخوا تر دې دغه تحریک ټینګار کړی چې له افغان حکومت سره به مذاکرات ونه کړي.
دا په داسې حال کې ده چې په دې وروستیو کې د امریکا د بهرنیو چارو د وزارت ځانګړي استازي زلمي خلیلزاد د افغانستان د سولې په هدف، کابل، اسلام اباد، ریاض، قطر او دبۍ ته سفرونه کړي دي.
ده له افغان حکومت او طالبانو وغوښتل چې د سولې د مذاکراتو لپاره پلاوی وټاکي.
خلیلزاد په دغو سفرونو کې د طالبانو له استازو سره لیدلي چې طالبانو او د افغانستان د سولې عالي شورا تأیید کړي دي.
د سیمې هېوادونو ته د خلیلزاد له سفر وروسته، له طالبانو سره مستقیمو مذاکراتو ته هیلې زیاتې شوې دي.
د ولسمشر لومړي مرستیال عبدالرشید دوستم د یکشنبې په ورځ ویلي وو چې حکومت باید اجازه ورکړي چې له طالبانو سره مستقیمې خبرې وکړي.
ده ویلي، د طالبانو په ژبه ښه پوهېږي او دواړه یو بل هم ښه پېژني.
دوستم دا هم ویلي چې د ولسمشرۍ ماڼۍ د مرستیالۍ څوکۍ ورته ارزښت نه لري، بلکې مهمه ورته په هېواد کې د جنګ پای ته رسېدل دي.
په ورته وخت کې د افغانستان د سولې عالي شورا مرستیال حاجي عزیزالله دین محمد وايي، امریکايي چارواکي دا هڅه کوي چې افغان حکومت له طالبانو سره په مستقمو مذاکراتو کې شامل شي.
دی وایي: «خلیلزاد هڅې کوي چې په دغو مذاکراتو کې افغانستان یا افغان دولت شامل شي، د افغانستان له لوري به یو مذاکراتي ټیم جوړ او رسمي او د ټولو په ګډون رسمي مذاکرات پیل شي».
ځیني افغان پوهان له دې ډلې ودیر صافی په دې باور دی چې تر هغې چې د پاکستان غوښتنې ونه منل شي، له طالبانو سره مستقیمې خبرې نه شي پیلېدای.
