د ننګرهار په سره رود ولسوالۍ کې دولتي ځواکونو عمليات کړي چې د ځايي خلکو په وينا، پنځه ملکي وګړي پې وژلي او دوه ماشومان يې ټپيان کړي دي.
بلخوا دولتي چارواکي وايي چې عمليات د طالب وسله والو د استخباراتو د مهمو غړو د په نښه کولو په موخه شوي چې ګڼ شمېر وسله والو ته پکې مرګ ژوبله اوښتې، خو ځينې ملکيانو جسدونه هم د ولس له لوري تر ولسوالۍ راوړل شوي دي.
د سيمې اوسېدونکو د تلې په ۳۰مه د اعتراض په توګه د وژل شويو پنځو ملکي وګړو جسدونه د سره رود ولسوالۍ تر مقامه راوړي وو او غوښتل يې چې د ولايت تر مخې يې ورسوي، خو هلته امنيتي ځواکونو د تګ اجازه ورنه کړه.
د اعتراض کوونکو له ډلې محمد نظير ناصري پژواک ته ويلي، دولتي ځواکونه وړمه ورځ ماښام نږدې شپږ بجې د سره رود ولسوالۍ بالاباغ سيمې ته ورغلي، هلته يې د طالب قوماندانانو نومونه اخيستي؛ خو ملکي وګړي يې په نښه کړي دي.
دی وايي، پنځه ملکيان وژل شوي او دوه ماشومان ټپيان شوي چې د وژل شويو جسدونه يې ټول له ځان سره راوړي دي.
د سيمې قومي مشر ملک نجيب الله ويلي چې د وژل شويو کسانو له ډلې دوه يې سپين ږيري کروندګر، دوه موټر چلوونکي او يو هم دوکاندار دي چې له وسله والو سره يې هېڅ اړيکې نه درلودې.
هغه غوښتنه کړې چې حکومت دې د دوی د وژل شويو کسانو د وژل کېدو په تړاو څېړنه وکړي او عاملينو ته دې سزا ورکړي.
د عتيق الله په نوم يو سپين ږيری چې وراره يې په دې پېښه کې وژل شوی وايي، وراره يې موټر چلوونکی و، پر ماشوم ناروغه مېرمن یې کور ته رسوله چې امنیتي ځواکونو وژلی دی.
اسد الله په جلال اباد ښار کې ښوونکی دی، د تره دوه زامن يې په ملي اردو کې دي؛ خو وايي، وړمه شپه يې کروندګر تره وژل شوی دی.
بلخوا د ننګرهار د والي وياند عطاءالله خوږياڼي ويلي چې عمليات د ملي امنيت ځانګړو ځواکونو کړي او د طالب وسله والو د استخباراتو مهم غړي يې په نښه کړي دي.
دی وايي چې په عملياتو کې ګڼ شمېر وسله والو ته مرګ ژوبله اوښتې او دغه راز ملکي کسانو ته هم مرګ ژوبله اوښتې چې د پنځو هغو جسدونه يې تر ولسوالۍ انتقال شوي دي.
د هغه په وينا، د پېښې د قربانيانو د کورنيو له غړو او د سيمې له قومي مشرانو سره والي او نورو مسوولينو د ليدنې پر مهال هغوی ته ډاډ ورکړی چې د پېښې څېړنه به کوي او عاملين به يې مجازات کوي.
تر دې وړاندې هم د دغه ولايت بېلابېلو ولسواليو کې د ملي امنيت د ځانګړو ځواکونو په عملياتو کې ملکي وګړو ته مرګ ژوبله اوښتې ده.
