یو شمېر سیاسي ګوندونه او جریانونه سره له دې چې په ټاکنو کې د خلکو له پراخ ګډونه هرکلی کوي، وايي چې ټاکنې له بې شمېره ستونزو او درغليو سره مخ وې.
د افغانستان سیاسي ګوندونو او جریانونو د تلې په ۲۸مه د ګڼ شمېر مرکزونو نه پرانيستل او يا په ځنډ سره پرانيستل یو پلان شوی عمل وباله.
دغو جریانونو پرون د یوه خبري کنفرانس پر مهال د یوه پرېکړه لیک په خپرولو سره وویل چې تکراري او له بایومېټریک پرته کارول شوې رایې باید باطلې اعلان شي.
د افغان ملت ګوند عمومي منشي ډاکتر نادر حساس د پرېکړه لیک یوه برخه ولوسته چې پکې راغلي وو: «په ډېرې خواشینۍ سره باید ووایو چې د ټاکنو لړۍ په ټول هېواد کې له ستونزو او بې شمېره درغلیو سره مخ وه چې د انتخاباتو بهیر يې د روڼتیا، مشروعیت او اعتبار له پلوه تر سختو پوښتنو لاندې راوستی دی، زموږ غوښتنه دا ده چې تکراري رایې باید باطلې اعلان شي او په هغو مرکزونو کې چې بایومېټریک سیسټم نه دی کارول شوی، رایې یې د منلو وړ نه دي.»
دوی همدا شان وویل، د رايې ورکولو په ډېرو مرکزونو کې څارونکو ته د څارنې اجازه نه ده ورکړل شوې او په یادو مرکزونو کې حاکمیت له زورواکو سره پاتې شوی.
دغو ګوندونو همدارنګه وویل چې ډېر ژر به د هېواد ملي ګټو ته په پام او له ولس سره له سلا مشورو وروسته د ۱۳۹۷ لمریز کال د ولسي جرګې د ټاکنو په تړاو خپل ګډ دریځ څرګند کړي.
په ورته مهال پر ټاکنو د څار بنسټونه هم په دې پروسه کې د ځينو نيمګړتياوو پر شتون نيوکه کوي او وايي چې ګڼ شمېر خلک د کمېسيون د کمزوري مديريت له کبله په ټاکنو کې له ګډون کولو پاتې شول.
د ټاکنو خپلواک کمېسيون چارواکي هم سره له دې چې په ټاکنو کې ځينې نيمګړتياوې مني، خو وايي چې د خلکو له رايو به ساتنه وکړي.
د ټاکنو د خپلواک کمېسيون مشر ګلاجان عبدالبديع صياد پرون مازديګر يوې خبري ناستې ته وويل چې په ۳۲ ولايتونو کې شاوخوا څلورو ميليونو کسانو په ټاکنو کې ګډون کړی و.
صياد وويل، د ټاکنو په ورځو کې د پېښو شويو ستونزو څېړنه کوي او که د کمېسيون کارکوونکي په سرغړونو کې ښکېل وي، سزا به ورکړل شي.
د کمېسيون رييس ډاډ ورکړ، د هغو مرکزونو رايې به په دقيقه توګه وڅېړي چې زورواکو پکې د بایومېټریک د نه کارولو هڅې کړې دي.
په ورته مهال د ټاکنيزو شکايتونو کمېسيون چارواکي هم وايي چې په ټاکنو کې د درغليو او سرغړونو په تړاو ګڼ شمېر شکايتونه ور رسېدلي چې د دوی له لوري به په بې پرې توګه وڅېړل شي.
د ټاکنيزو شکايتونو کمېسيون غړی او وياند علي رضا روحاني د ټاکنو کمېسيون پړ بولي چې د کمزوري مديريت له کبله يې ځينې خلک له رايې ورکولو پاتې شول او په پروسه کې ستونزې پېښې شوې.
د ټاکنيزو شکايتونو کمېسيون وايي، تر نن ماښامه په خپلو ولايتي دفترونو کې شکايتونه ثبتوي او وروسته به یې څېړنې پيل کړي. دوی خبرداری ورکوي چې په درغليو کې ښکېل کسان به مجازات کړي.
