ارګ: تمه ده چې ډېر ژر طالبان او افغان حکومت مخامخ خبرو ته کېني

ارګ وایي له طالبانو سره دخبرو لپاره د افغان حکومت او امریکا هڅې بې ساري دي. د ولسمشرۍ ماڼۍ د ستراتيژیکو اړیکو رییس محمد هارون چخانسوري ویلي، د افغان سولې په هکله د امریکا او افغانستان تر منځ د نظر یووالی موجود دی او هېڅ ډول اختلاف په دې برخه کې نشته دی. دده په خبره سختې هڅې روانې دي چې ډېر ژر افغان حکومت او طالبان د امریکا په منځګړیتوب مخامخ خبرې پيل کړي. دده په وینا د امریکا هڅې هم ددې لپاره دي څو طالبان له افغان حکومت سره مخامخ خبرو ته وهڅوي. چخانسوري وایي سره له دې چې د سولې په برخه کې د زلمي خلیلزاد تر سفر وروسته کوم نوی پرمختګ نه تر سترګو کېږي خو بیا هم دوی هیله من دي چې د هڅو دغه لړۍ نوره هم چټکه شي او د مخامخ خبرو زمینه برابره شي. بل پلو داسې راپورونه هم خپاره شوي چې د امریکا د ملي امنیت سلاکار جان بولټن به مسکو ته د خپل سفر پر مهال له روسانو وغواړي چې طالبان د سولې خبرو ته وهڅوي. طالبان له دې سره سره ټینګار کوي چې یوازې له امریکا سره خبرې کوي او افغان حکومت ته خبرو جوګه نه دی.