امریکا وایي د افغانستان د ټاکنو پروسه بریالۍ وه

د امریکا د ولسمشر مرستیال مایک پینس له ولسمشر غني سره په تلیفوني اړیکه کې نوموړي ته د پارلماني ټاکنو د ترسره کېدو له امله مبارکي ورکړې ده. مایک پینس دغه ټاکنې بریالۍ بللې دي او په وینا یې افغانانو له امنیتي تهدیداتو سره سره په ټاکنو کې پراخ ګډون کړی دی. هغه ویلي افغانانو په ټاکنو کې د ګډون پر مټ وښوده، چې دوی ولسواکۍ ته ژمن دي او له جګړو ستړي شوي دي. د ارګ له مطبوعاتي دفتره په خپره شوې خبرپاڼه کې راغلي، چې دواړو لورو په افغانستان کې د وروستیو پېښو په اړه هم بحثونه کړي دي. مایک پینس ویلي په کندهار کې د یوه پیاوړي نظامي قومندان جنرال رازق پر مړینه هم خواشیني دي او په دې اړه د خپلې غمرازۍ مراتب له افغان حکومت سره شریکوي.