ولسمشر غني په یوه سفر کندهار ته تللی دی

د رسنیو د راپورونو له مخې هغه نن سهار کندهار ته رسېدلی دی او هلته یې د جنرال رازق د کورنۍ له غړو سره لیدلي دي. په دې سفر کې له نوموړي سره لوړپوړي حکومتي چارواکي هم ملتیا کوي. ولسمشر به په دغه سفر کې د کندهار له ځایي چارواکو سره د وروستۍ پېښې او راتلونکو امنیتي تدابیرو په اړه له نږدې خبرې وکړي. ولسمشر تر دې وړاندې جنرال رازق یو پیاوړی او زړه ور قومندان یاد کړی و او د هغه وژل کېدل یې د افغانستان د اوسني وضعیت د کنټرول لپاره ستره ضایعه بللې وه. جنرال رازق تېره پنجشنبه په کندهار ولایت کې به یوه ترهګریز برید کې ووژل شو. هغه په جنوبي ولایتونو کې له پراخ نفوذ برخمن و او ددغه سیمو په امنیت کې یې پوره رول لوبولی و. د نوموړي وژل کېدو سیمه ییز او نړیوال غبرګونونه پارولي دي. په دې وروستیو کې په ټولنیزو رسنیو کې ګڼو کاروونکو له ولسمشر غوښتي چې هغه ته د ملي اتل لقب ورکړي او د پولیسو د روزنې اکاډمي دې د نوموړي په نامه ونوموي.