ولسمشر غني د جنرال رازق له کورنۍ سره کتلي دي

د ارګ له مطبوعاتي دفتره په خپره شوې خبرپاڼه کې راغلي چې ولسمشر غني په منډېګک ماڼۍ کې د جنرال رازق له مور او ورور عطاالدین خان سره کتلي دي. ولسمشر په دې لیدنه کې ویلي جنرال رازق د هېواد یو پیاوړی نظامی قومندان و، چې د جنوبي ولایتونو په امنیت کې یې پوره هڅه کړې ده. دده په خبره افغانان به ددغه زړه ور جنرال سرښندنې هېرې نه کړي. ولسمشر همدا راز د جنرال رازق مزار ته ورغلی دی او د هغه روح ته یې دعا کړې ده. ولسمشر وویل، چې ټول هېواد د جنرال رازق له کورنۍ سره په دغه ستر غم کې شریک دی او ددوی درد خپل درد ګڼي. ولسمشر غني نن سهار د یوه لوړپوړي پلاوي په ملتیا کندهار ښار ته لاړ. ټاکل شوې ده چې نوموړی به په دغه سفر کې د جنرال رازق له کورنۍ سره دلیدنې تر څنګ د کندهار ولایت له ځايي چارواکو سره هم لیده کاته ولري.