د کورنیو چارو وزارت وايي چې د ولسي جرګې د ټاکنو په ورځو کې يې د ۱۷۲۵بريدونو مخه نیولې ده.
که څه هم د ولسي جرګې په ټاکنو کې له شته امنیتي ګواښونو سره سره بیا هم د خلکو پراخ ګډون په ملي او نړیواله کچه وستایل شو، خو دا ټاکنې د لسګونو افغانانو د سر په بیه هم پرېوتې.
د کورنیو چارو وزارت وايي، وسله والو مخالفینو د ټاکنو په ورځو کې ۱۸۱۳ بريدونه پلان کړي وو چې یوازې ۱۹۳ يې عملي کړي او د نورو مخه يې د افغان امنیتي ځواکونو له خوا ونیول شوه.
د کورنيو چارو وزارت وياند نجيب دانش وایي: «په ټوله کې دښمن ۱۹۳ پېښې ترسره کړې چې ۸۹ يې په انتخاباتي مرکزونو او محلونو وې او پاتې نورې يې په امنیتي ځواکونو وشوې، په ټوله کې چې وسله والو مخالفینو کومې حملې پلان کړې وې شمېر يې ۱۸۱۳ ته رسېده چې یوازې دوی د ۸۹ پېښو په کولو وتوانېدل او د پاتې ۱۷۲۵ پېښو مخه ونیول شوه.»
دانش وویل چې په دغو پېښو کې ۵۲ امنیتي منسوبين او ولسي وګړي وژل شوي او تر ۱۲۵ نور ټپيان شوي دي.
وسلهوالو طالبانو د ټاکنو په دوو ورځو کې د ۴۰۷ بريدونو ادعا کړې او ویلي یې دي چې په دې بريدونو کې یې لسګونو افغان امنیتي سرتېرو ته مرګ ژوبله اړولې ده.
د طالبانو ویاند ذبیح الله مجاهد ازادي راډيو ته په یو لیکلي پیغام کې ویلي چې دوی تر ډېره هڅه کړې چې د ملکي وګړو ژوند ته پام وکړي.
دا په داسې حال کې ده چې د روانې اونۍ د شنبې په ورځ چې د تلې ۲۸مه کېده له کندهار او غزني پرته په ټول افغانستان کې د ولسي جرګې ټاکنې وشوې.
که څه هم په دې ورځ د ځینو تخنيکي او امنیتي ستونزو له امله په بېلابېلو ولایتونو کې د رايې اچونې یو شمېر مرکزونه بند پاتې شول، خو د ټاکنو خپلواک کمېسیون په دې مرکزونو کې د یوې بلې ورځې لپاره رايه اچونې اعلان وکړ.
د کورنیو چارو وزارت وايي چې د ټاکنو په دويمه ورځ د امنیتي ګواښونو له امله هېڅ مرکز تړلی نه دی پاتې شوی، خو د ټاکنو د خپلواک کمېسیون مسوولینو وړمه ورځ وویل چې د ۴۰۱ بندو مرکزونو له ډلې په ۲۵۳ مرکزونو کې د ټاکنو په دويمه ورځ رایه اچونه وشوه او پاتې نور د امنیتي ګواښونو له امله تړلي پاتې شول.
