د غزني يو شمېر اوسېدونکي وايي چې وسله والو طالبانو د ګيرو ولسوالۍ ښوونکي او د پوهنې مديريت ١٢٥ کارکوونکي برمته کړي دي.
د غزني د ولايتي شورا پخواني غړي نادرخان ګيرووال د لړم په لومړۍ نېټه پژواک خبري اژانس ته ويلي چې طالبانو د ګيرو ولسوالۍ ښوونکي او کارکوونکي ټول برمته کړي دي.
هغه زياته کړې: «طالبانو په کراتو استادانو ته ويلي وو چې د بانک له لارې معاش وا نه خلي، د معتمد له لارې يې واخلي څو طالبان هم خپله برخه پکې واخلي، خو دوى دا کار ونه کړ، ځکه يې ټول استادان او کارکوونکي له تېرو دوه ورځو راهيسې برمته کړي دي.»
د نوموړي د معلوماتو له مخې، طالبانو د دې ولسوالۍ د ښوونکو په ګډون ١٢٥ تنه کارکوونکي برمته کړي او په بېلابېلو ځايونو کې يې ساتي.
همدارنګه د غزني د ولايتي شورا مرستيال امان الله کامراني هم وايي چې له تېرو دوو ورځو راهيسې د ګيرو ولسوالۍ ښوونکي او د پوهنې مديريت کارکوونکي له طالبانو سره دي.
ده وويل چې د خلاصون لپاره يې هلې ځلې پيل شوې دي.
دغه راز د دې ولسوالۍ اوسېدونکي نعمت الله پژواک ته ويلي: «ټول استادان طالبانو وړي دي، دا دوه ورځې کېږي چې د شاګردانو پر مخ مکتبونه تړل شوي دي.»
د غزني د والي وياند محمد عارف نوري بيا ويلي چې طالبانو، ښوونکي بېرته را پرېيښي دي.
نوري زياته کړې: «١٦٠ تنه استادان او کارکوونکي يې وړي وو، ورته يې ويلي چې نور به د بانک له لارې معاش نه اخلي او بايد د پخوا په څېر معتمد ورته معاش راوړي، نو همدا ده چې بېرته يې را خوشي کړي دي.»
نوري وايي چې طالبان په دغه کار سره غواړي څو د ښوونکو په منځ کې د ځان لپاره خيالي استادان ځاى پرځاى کړي.
بل لور ته د طالبانو وياند ذبيح الله مجاهد پژواک ته ويلي چې په دې اړه پلټنې کوي او وروسته به رسنيو ته ځواب ورکړي.
د يادونې ده چې په ټول غزني کې نږدې شپږ سوه ښوونځي دي چې څه باندې پنځه سوه زره زده کوونکو ته پکې د شاوخوا اته زره استادانو له لوري تدريس کېږي.
