د افغانستان د انتخاباتي شکايتونو کمېسيون وايي دوى ته ځينې جدي شکایتونه ور رسېدلي دي.
د دغه کمېسيون په باور ممکن تر څېړنو او ارزونو وروسته دغه جدي شکايتونه د ځينو ولايتونو د انتخاباتي حوزو د رايو د باطلېدو سبب شي.
د انتخاباتي شکايتونو د کمېسيون مرستيالې حميرا حقمل ازادۍ راډيو ته وويل:
«”څرنګه چې په قانون کې دغه موارد پېشبيني شوي دي. طبعاً د افغانستان ټاکنې هم له دغسې وضعيت څخه لرې نه دي. داسې موارد شته چې د شکايتونو تر څېړنې او ارزونې وروسته د ځينو حوزو رايې باطلې اعلان او په هغو حوزو کې بيا انتخابات وشي.»
حقمل زیاتوي، د دوى لومړنۍ ارزونې ښيي چې زياتې انتخاباتي سرغړونې په کابل، لغمان او ميدان وردګ ولايتونو کې شوې دي.
دغه کمېسيون وايي، دوشنبې ورځ يې شااوخوا ١٠٠٠ شکايتونه ثبت کړي او د انتخاباتو په دوو ورځو کې هم ٦٠٠٠ شکايتونه له دوى سره ثبت شوي دي.
د انتخاباتو خپلواک کمېسيون په تېرو انتخاباتو کې سرغړونې تایيدوي، خو فکر کوي چې ښايي ډېرې جدي نهوي، د دغه کمېسيون په حواله که چېرې د انتخاباتي شکايتونو له کمېسيون سره درج شوي شکايتونه مستند وي او پر اساسيې د ځينو حوزو رايې باطلې اعلانېږي، دوى بهيې تاييد کړي.
د دغه کمېسيون وياند سيد حفيظالله هاشمي وايي:
“ځينې سرغړونې دي چې له قانون سره سمې څېړل کېږي. هر څه چې قانون پېشبيني کوي او مستند وي د ټاکنو خپلواک کمېسيون به ورسره مشکل ونهلري، په دې شرط چې مستند او معتبر اسناد وي، حقوقي او قانوني اړخ يې هم په پام کې نيول شوى وي.»
