ولسمشر غني له پاکستانه وغوښتل چې د کندهار د وروستۍ پېښي عاملین دې افغانستان ته وسپاري.
ولسمشر محمد اشرف غني د کندهار په منډیګک ماڼۍ کې د قومي مشرانو او ولسي خلکو یوې لویې غونډې ته په وینا کې له پاکستانه وغوښتل چې د کندهار د وروستي بريد عاملين دې ونيسي او افغانستان ته يې دې وسپاري.
غني زیاته کړه: «پاکستان ته وایم، توطیه په پاکستان کې جوړه شوې، مجرمین راکړئ چې موږ يې محاکمه کړو، هر رنګه بین المللي هیئت چې منی را دې شي چې څېړنه وکړي چې موږ په حق یو که نور په حق دي.»
ولسمشر دغه غوښتنه وروسته تر هغه کوي چې وړمه ورځ د ملي امنیت لوی رییس محمد معصوم ستانکزي په یوه مطبوعاتي کنفرانس کي وویل چې د کندهار د پېښې پلان د پولې ها غاړه جوړ شوی و.
په ورته مهال د ملي امنيت پخواني رييس رحمت الله نبيل ويلي چې د کندهار ترهګريز بريد په کوټه شورا کې طراحي شوی و او بریدګر د پاکستاني استخباراتي ادارې تر نظارت لاندې د ځانمرګو په یوه روزنځای کې روزل شوی و.
هغه وويل، د جنرال رازق د وژل کېدو قضيه ډېر پټ اړخونه لري چې باید روښانه کړای شي.
نوموړي ټینګار کړی چې د قضیې په اړه د کندهار والي زلمی ویسا هم باید تر پوښتنو ګروېږنو لاندې ونیول شي او پخپله شاوخوا کې د یوه ساتونکي د ګومارلو د څرنګوالي سپیناوی دې وکړي.
ولسمشر غني کندهار ته د سفر پر مهال د کندهار د امنیه قوماندان جنرال عبدالرازق له کورنۍ سره د غمرازۍ تر څنګ نوموړي ته د خپلواکۍ د ملي اتل لقب ورکړ او د دې ولایت د پولیسو اکاډمي يې د قوماندان رازق په نوم کړه.
غني کندهار ته له رسېدو سره سم په خرقه مطهره کې د دغه ولایت د وژل شوي امنیه قوماندان جنرال عبدالرازق مزار ته ولاړ او هغه ته یې دعا وکړه.
ولسمشر دغه راز د قوماندان رازق د مزار د جوړېدو او په کابل او کندهار کې يې د نوموړي په نوم د يو شمېر واټونو د نومولو سپارښتنه هم وکړه.
نوموړي له قومي مشرانو سره په خبرو کې وویل چې د کندهار د خلکو غوښتنې او مشورې مني او له دې وروسته د کندهار د خلکو خبره او مشوره د حکومت تګلاره ده او منل کېږي به: «په کابل او کندهار کې به سړکونه د دغه ملي اتل په نوم یادېږي او دا کار به ژر کېږي. د کابل ښاروالۍ او د کندهار ښاروالۍ ته مي هدایت دا دی چې ژر تر ژره دا کار وکړي، د کندهار د پولیسو تعليمي مرکز به سر له ننه د شهید ستر جنرال عبدالرازق په نوم ونومول شي، د خپلواکۍ د اتل شهید لقب به ستر جنرال عبدالرازق خان ته ورکړو او ستاسي مشوره به زما تګلاره وي.»
پر جنرال رازق تېره پنجشنبه تر يوې مهمې غونډې وروسته د چارواکو د تګ پر مهال د والي يوه ساتونکي برید وکړ چې له امله يې نوموړی او د ملي امنيت رييس ووژل شول.
د بريد پړه طالبانو پر غاړه اخيستې او ويلي يې دي چې قاتل د دوی نفوذي کس و.
