په لندن کې د مړینې نیمه برخه د کرونا له کبله ده

د برېتانیا د ملې ادارې د شمېرو له مخې په دغه هېواد کې د کرونا له خپرېدو وروسته بیا د اپرېل تر درېیمې په لندن کې د خلکو د مړینې نیمه برخه د کرونا ناروغۍ له خپرېدو سره تړاو لري. د برېتانیا پلازمېنه لندن هغه ښار دی چې ډېره مړینه پکې رامنځ ته شوې ده. د بي بي سي فارسي د راپور له مخې په انګلستان او  ولز کې د تازه شمېرو له مخې په هغه اونۍ کې د خلکو شل سلنه مړینه د همدې ناروغۍ له کبله وه او یا یې هم په یو ډول له دې ناروغۍ سره تړاو درلود. د راپورونو له مخې هغه اونۍ چې د اپرېل په درېیمه پای ته ورسېده په ولز او انګلستان کې له ۱۶ زره مړو شویو کسانو شپږ زره یې د مرګ نه وو. که څه هم چې د یادو شپږو زرو کسانو مړینه د کرونا له کبله وه، خو دا چې د پاتې نورو د مړینې لامل څه و تر اوسه نه ده په ډاګه شوې. څېړونکي په دې اند دي، چې کېدای شي ددغه کسانو د مړینې لامل دا وي چې د ډاکټرانو لخوا په پټو سترګو پرکرونا ناروغۍ اخته بلل شوي او یا هم د قرنطین پر مهال پر نورو ناروغیو د اخته کېدو د تشخیص اجازه نه وي ورکړل شوې. د روغتیایي ادارو د شمېرو له مخې په ټوله برېتانیا کې د دوشنبې تر ورځې له ۱۱ زره او ۳۰۰ کسانو ډېر د کرونا له کبله مړه شوي وو او تر ۸۸ زره ډېر پرې اخته شوي وو. د برېتانیا د ملي ادارې د شمېرو له مخې په دغه هېواد کې له کرونا ناروغۍ د مړو شویو کسانو شمېر تر هغه ډېر دی، چې په ورځني ډول د دولت لخوا په روغتونونو کې اعلان شوی دی. ددغه هېواد پر روغتونونو سربېره په امن خونو او د عمر خوړلو کسانو په کورونو کې هم د کرونا ناروغۍ له کبله ډېر کسان مړه شوي دي.