پاکستان د افغان سولې په تړاو د مسکو غونډه کې ګډون کوي

د راپورونو له مخې، پاکستان هم د افغان سولې په تړاو د مسکو غونډه کې ګډون کې د ګډون ژمنه کړې ده. که څه هم انټر فاکس اژانس د خپلو سرچینو په حواله خبر ورکړی چې یاده غونډه به د نوامبر د میاشتې په لومړۍ نېټه تر سره شي، خو د روسیې د بهرنیو چارو وزارت بیا وایي، تر اوسه پورې د یادې غونډې د ګډونوالو شمېر او د تر سره کېدو کره نېټه معلومه نه ده. په ورته وخت کې د ټایمز ورځپاڼې د معلوماتو پر بنسټ، په لوړه کچه پاکستاني چارواکي، چې ښایي د بهرنیو چارو وزارت مرستیاله تهمینه جنجوعه واوسي یاده ناسته کې د ګډون په موخه مسکو ته لاړه شي. بلخوا انټرفاکس اژانس په دې وروستیو کې خبر ورکړی و، چې طالبانو هم یاده ناسته کې د خپل ګډون پخلی کړی او زیاته کړې یې ده، چې له قطر نه به یې یو پلاوی دې ناسته کې د ګډون لپاره مسکو ته ورشي. ټاکل شوې وه، د افغان سولې په اړه د مسکو غونډه د روانې سپټمبر میاشتې په څلورمه نېټه تر سره شي، خو د ولسمشر غني په غوښتنه تر نامعلومې نېټې پورې وځنډېده.