د کمیسیون ځینې کارکوونکي لا هم جوزجان کې بند پاتې دي

د ټاکنو کمیسیون ځینې کارکوونکي وایي، د ولسي جرګې تر ټاکنو درې ورځې وړاندې د جوزجان ولایت دوو ولسوالیو ته د امنیتي ځواکونو په چورلکو کې لېږدول شوي خو تر اوسه پورې بیرته نه دي راستانه شوي. د ولسي جرګې له ټاکنو لس ورځې په تېرېدو دي خو د یاد کمیسیون ځینې کار کوونکي چې د جوزجان ولایت دوو، منجیګک او قره قین ولسوالیو ته د امنیتي ځواکونو د چورلکو له لارې استول شوي تر اوسه هلته بند پاتې دي او بیرته مرکز ته نه دي لېږدول شوي. هغوی وایي د یادو دوو ولسوالیو انتخاباتي مواد هم لا هلته پاتې دي او د دوی د رالېږدولو لپاره هم تر اوسه هیڅ اقدام او ژمنه نه دی شوې. دې کارکوونکو له یادو ولسوالیو نه د ټلفون پر کرښه رسنیو ته ویلي، دوی د هوا له لارې لېږدول شوي، امنیت خراب دی، دوی خپله نه شي تللی. دوی وویل له مرکزي دفتر سره یې هم څو ځلې اړیکه نیولې خو تر اوسه پورې هیڅ اقدام نه دی شوی. د جوزجان د یادو دواړو ولسوالیو لارې له سختو امنیتي ګواښونو سره مخ دي. د ټاکنو کمیسیون چارواکي بیا وایي، ډېر ژر به هلته بند پاتې کارکوونکي د چورلکو له لارې مرکز ته را ورسوي.