د رڼو ټاکنو بنسټ یا ټیفا وايي چې تر ولسمشريزو ټاکنو وړاندې بايد په ټاکنيزو کمېسيونونو او بنسټونو کې ژور اصلاحات راشي.
ټیفا وايي چې د ټاکنيزو کمېسيونونو د کمزوري مدیریت له کبله، د ولسي جرګې په ټاکنو کې پراخې سرغړونې او درغلۍ وشوې.
د دغه بنسټ ريیس نعیم ایوب زاده پرون له خبریالانو سره د ولسي جرګې د ټاکنو په تړاو د لومړنیو موندنو د شریکولو په غونډه کې وویل چې تر ولسمشريزو ټاکنو وړاندې بايد د ټاکنيزو کمېسیونونو په ګډون، د ټاکنو په جوړښت کې اصلاحات رامنځته شي.
ايوب زاده زياته کړه: «که ولسمشريزې ټاکنې پر خپل وخت ترسره نه شي، د افغانانو د برخلیک په وړاندې به لویه ستونزه وي، لویه کمزوري ټاکنيزو مدیریتي بنسټونو ته ورګرځي، له ټاکنو وړاندې باید په جوړښت او حقوقي چوکاټ کې اصلاحات رامنځته شي.»
د ټيفا رييس وويل چې یو شمېر کړۍ او په حکومت کې د ننه کسان هڅه کوي چې یوې سیاسي معاملې ته زمینه برابره کړي چې په خبره یې، د ا ډول هڅې د خلکو رایې قرباني کوي.
د ټاکنو خپلواک کمېسیون د راتلونکي کال د حمل ۳۱مه د ولسمشريزو ټاکنو د ورځې په توګه اعلان کړې ده.
د ټاکنو د کمېسیون غړي او ویاند سیدحفیظ الله هاشمي وړمه ورځ وویل چې د ولسمشريزو ټاکنو مهالوېش چمتو شوی او په روانه اونۍ کې به له سیاسي ګوندونو، د ټاکنيزو شکايتونو له کمېسيون او دغه راز به یې پر ټاکنو د څار له بنسټونو سره شريک کړي.
د ټاکنو کمېسیون وايي، څارونکي بنسټونه باید پر ټاکنو تخنیکي څار وکړي او له سیاسي مداخلې دې لاس واخلي.
د دغه کمېسیون مرستیال ویاند ذبیح سادات ازادي راډيو ته ویلي چې ولسمشريزو ټاکنو ته پنځوس سلنه چمتووالی بشپړ شوی دی.
ده زیاته کړې: «له ټولو څارونکو بنسټونو زموږ غوښتنه دا ده چې د دوی لیدلوری باید تخنیکي و اوسي، نه سیاسي. د جمهوري ریاست لپاره چمتووالی نیول شوی، پنځوس سلنه کارونه یې مخکې تللي او کمېسیون ژمن دی چې د جمهوري ریاست انتخابات په خپل وخت ترسره کړي.»
په ورته مهال ولسمشرۍ ماڼۍ وايي چې ولسمشريزې ټاکنې به پر ټاکلي وخت کېږي.
د ولسمشرۍ ماڼۍ مرستيال وياند شاه حسين مرتضوي رسنيو ته ويلي چې حکومت ټاکنو ته د بودجې او امنيت برابرولو مسووليت لري او د ټاکنو تخنيکي چارې د کمېسيون اړوند دي چې بايد ترسره يې کړي.
د چارو شنونکي بيا پر دې باور دي چې د ملي يووالي حکومت د ټاکنيز نظام د اصلاح کولو په پلمه ډېر وخت ضايع کړی او اړتيا ده چې اوس د راوستو اصلاحاتو په تړاو ولس ته معلومات ورکړي.
د چارو شنونکی حامد هاشمي وايي، د ولسي جرګې ټاکنې د اصلاحاتو په پلمه درې کاله وځنډول شوې او درې کاله وروسته هم دا ټاکنې له جدي ستونزو او پراخو درغليو سره ملې وې.
هاشمي وايي، د ملي يووالي حکومت بايد نه يوازې دا چې ولسمشريزې ټاکنې پر خپل وخت وکړي، بايد ولس ته ځواب ووايي چې د ولسي جرګې ټاکنې ولې له جدي ستونزو او پراخو درغليو سره ملې وې.
