د ولسمشر غني او ډاکټر عبدالله عبدالله تر منځ د شوي توافق پر اساس، د نوموړي تازه لس وزیران وزارتونو ته د سرپرست په توګه ور معرفي شول. د راپورونو له مخې، ولسمشر غني پرون د جلا فرمانونو له مخې له ډاکټر عبدالله عبدالله سره د هوکړې مطابق لس تنه سرپرست او نوماند وزیران معرفي کړي دي. د ولسمشر ویاند صدیق صدیقي تېره ورځ په خبري کنفرانس کې وویل چې د هوکړې د پاتې مواردو د عملي کېدو چارې هم روانې دي او هڅه کېږي چې د پیاوړي حکومت د جوړولو لپاره اقدام وشي.
سره له دې چې د افغانستان ولسمشریزې ټاکنې له ناندریو ډکې وې، نو دوه مخکښ ټاکنیز سیالان دې ته تیار شول چې د ګډ حکومت د جوړولو لپاره هوکړه سره وکړي. د هوکړې له مخې به نیمایي کابینه د ډاکټر عبدالله عبدالله له لوري معرفي کېږي چې تر دې دمه پر دغه مورد عمل نه و شوی. پرون حکومت تازه پرېکړه کړې چې د لسو وزارتونو لپاره به د ډاکټر عبدالله عبدالله له ډلې نوماند او سرپرست وزیران معرفي کوي.
د ولسمشر ویاند صدیق صدیقي وایي چې د جلا جلا فرمانونو له لارې ولسمشر غني د لسو وزارتونو لپاره نوماند وزیران او سرپرستان معرفي کړي، چې ډېر ژر به ولسي جرګې ته د باور رایې د اخیستلو لپاره معرفي کړل شي. د صدیقي په خبره: ((د جمهوري اسلامي افغانستان کابینه مکمله شوې ده، چې دوی به ډېر ژر ولسي جرګې ته د باور رایې د اخیستلو لپاره ور معرفي کېږي)).
د صدیقي په خبره، بشیر احمد تینج د کار او ټولنیزو چارو، نثار احمد غوریاني د صنعت او سوداګرۍ، قدرت الله ذکي د ترانسپورت، معصومه خاوري د مخابراتو او معلوماتي ټکنالوژۍ، انورالحق احدي د کرنې، محب الله صمیم د سرحدونو او قبایلو، فضل احمد معنوي د عدلیې او نور رحمان اخلاقي د کډوالو او بیرته راستنیدونکو چارو وزارت د نوماند او سرپرست وزیرانو په توګه ټاکل شوي دي.
صدیقي د دې تر څنګ د سولې او بین الافغاني خبرو د پيل په اړه هم خبرې وکړې. نوموړي وویل چې افغان حکومت د سولې ملاتړی دی او په دې برخه کې یې هڅې کړې دي، خو طالبانو تر دې دمه پر خپلو ژمنو عمل نه دی کړی او د دې اړتیا ده چې د دوحې هوکړې له مخې هم تاوتریخوالی کم کړي او هم د بندیانو په خوشې کولو کې رښتیني اوسي. صدیقي وايي، طالبانو لا هم د افغان پوځ بندي سرتېري نه دي خوشې کړي او نه یې هم د دوی د خوشې کولو په اړه څه ویلي دي. صدیقي زیاتوي: ((دا زموږ هیله ده چې بین الافغاني مذاکرات پيل شي. موږ غواړو چې جګړه پای ته ورسېږي. دا د هر افغان غوښتنه ده. خو زموږ د زندانیانو د خوشې کېدلو مسئله هم خورا مهمه ده. دوی باید ژر تر ژره خوشې شي. هیلې شته دي، ټول اړخونه پر دې مسئله کار کوو او ژر به بین الافغاني خبرې پيل شي)).
بلخوا تازه د ملي مصالحې عالي شورا مشر ډاکټر عبدالله عبدالله د ولسمشر غني پر هغه فرمان غبرګون ښودلی، چې له مخې یې د ملي مصالحې عالي شورا ته ځينې غړي ور معرفي شوي وو. د ملي مصالحې عالي شورا رییس عبدالله عبدالله وایي، د ۱۳۹۹ کال د غویي میاشتې د ۲۸مې نېټې هوکړې له مخې، د دغې شورا د رسمیت او رامنځ ته کېدو بحث د ملي مصالحې عالي شورا له لوري له ولسمشر، سیاسي اشخاصو، ملي شورا له رییسانو، مدني ټولنې او د هېواد له نخبه ګانو سره په مشوره تشکیلېږي، نو په دې بنسټ د دغې شورا ایجاد د ملي مصالحې عالي شورا د رییس صلاحیت دی او د ولسمشرۍ ماڼۍ د فرمان ایجاب نه کوي. ارګ بیا وایي چې د دې شورا غړي ولسمشر معرفي کوي او ښایي په افرادو کې لږ او یا هم ډېر بدلون شي. ارګ ټینګار کوي چې په شورا کې باید ټول اړخونه حضور ولري او ټول د سولې لپاره کار وکړي.
