رنګین دادفر سپنتا: نور افغانستان کې استعمار، امیرالمومنین او ریاستي نظام نه چلېږي

افغانستان کې د اشغال، ریاستي نظام او امیر المومنین وخت او زمانه نوره پای ته رسېدلې ده. د پخواني ولسمشر حامد کرزي د ملي امنیت سلاکار او د افغانستان د پالیسۍ جوړونې په برخه کې مطرح څېرې رنګین دادفر سپنتا په خپله یوه تازه مرکه کې ویلي چې د افغانستان د سولې مسئله خورا حساسه ده. دده په خبره طالبان د سولې په خبرو کې د امریکا او پاکستان مستقیم ملاتړ له ځان سره لري، د پاکستان په غوښتنه د حکومت جوړولو هڅه کېږي او داسې هڅه روانه ده چې د امریکا استعماري رول پاکستان ته ورکړل شي. د سپنتا په خبره له ۲۰۰۱ کال راهیسې په افغانستان کې د امریکا رول استعماري وو او تل یې هڅه کړې د افغانستان پر کورنیو او بهرنیو چارو پوره کنټرول ولري. سپنتا زیاتوي اوس د افغانستان د اشغال وخت پای ته رسېدلی دی او امریکا باید په دې پوه شي چې په افغانستان کې یې استعماري پلانونه نور کار نه ورکوي او افغانان په رښتینې مانا د یوه ولسواک او مشروع نظام غوښتونکي دي. هغه د افغانستان د راتلونکي نظام د جوړښت په اړه هم ویلي، چې ریاستي نظام هم یو کاپي نظام و او اوس طالبان هڅه کوي د ایران د اخوندي نظام کاپي افغانستان ته راوړي چې دا به هم دلته کارنده نه وي. سپنتا زیاتوي چې افغانستان په رښتینې مانا یوه خپلواک ولسواک او مشروع نظام ته اړتیا لري. دده په وینا دلته د امیرالمومنین او د امریکا د کاپي ریاستي نظام موده هم پای ته رسېدلې ده. هغه د افغانستان اوسني قوانین کمزوري بولي او په خبره یې هر زورواکی یې د بدلون توان لري چې له همدې امله باید په افغانستان کې په رښتینې مانا د یوه پیاوړي نظام او بنسټیزو قوانینو پر رامنځ ته کولو فکر وشي.