په کابل کې د نا امنیو په دوام، افغان حکومت او طالبانو دواړو د ښاریانو د امنیت د تامین په تړاو تبلیغات کړي دي. په ټولنیزو رسنیو کې په کابل ښار کې د نا امنیو او جنايي جرمونو په تړاو تر پر له پسې شکایتونو وروسته وسله والو طالبانو د کابل ښار په ځینو سیمو کې ابلاغیې خپرې کړي او کابل ښاریانو ته یې ډاډ ورکړی چې د دوی وسله وال به د خلکو امنیت تامین کړي. په ټولنیزو رسنیو کې بیا خلکو دا د حکومت لپاره ستر ننګ بللی دی. بلخوا کورنیو چارو وزارت بیا د مجرمینو پر وړاندې د جدي اقداماتو خبر ورکړی دی.
په دې وروستیو ورځو کې د سختو وحشتناکو جنایي پېښو او غلاوو په تړاو د کابل ښاریانو غږ پورته شو. کابل ښاریانو په ټولنیزو رسنیو کې د پراخ کمپاین له لارې د کابل امنیتی مسوولین بې کفایته وبلل او په خبره یې، دوی په غلاوو او روانو جنایتونو کې په غیر مستقیمه توګه ښکېل دي او کمزوری مدیریت د لسګونو کابل ښاریانو د وژل کېدو سبب شوی دی. په همدې څو ورځو کې د کابل په بېلابېلو سیمو کې بوږنوونکې جنایي پېښې رامنځته شوي او د یوه مبایل یا څو افغانیو لپاره غلو ښاریان وژلي دي.
پرون شپه د کورنیو چارو سرپرست وزیر مسعود اندرابي امنیتي ناسته رابللې ده او د کابل ښار د امنیت په تړاو یې له دوی سره خبرې کړې دي. د کورنیو چارو وزارت ویاند طارق آرین وایي، په دې غونډه کې ټینګار شوی چې امنیتي چارواکي دې ژر تر ژره د کابل ښار په وضعیت کې بدلون راولي. د اندرابي په خبره، کابل ښاریان امنیت ته اړتیا لري او امنیتي مسوولینو ته په کار ده چې د دوی د امنیت لپاره اړین اقدامات ترسره کړي. طارق آرین وایي چې انداربي پولیسو ته د غلو او جنایتکارانو د وژلو امر هم کړی دی. د ده په وینا: ((سرپرست وزیر د کابل له ورودي دروازو لیدنه وکړه، په ښار کې د ننه یې له امنیتي پوستو او حوزو لیدنه وکړه، پولیسو ته یې پر غلو او مجرمینو د برید امر وکړ او ویې ویل، که له پولیسو سره یې مقابله وکړه، نو ختم یې دې کړي)).
دا چې د کورنیو چارو وزارت دغه خبرداری به اغېزناک وي کنه، وروسته به معلومه شي، خو دغه وزارت تر دې وړاندې هم د غلو او مجرمینو پر وړاندې د جدي اقداماتو خبر ورکړی و. په کابل ښار کې یې پر موټرسایکلونو تګ راتګ بند کړی و او د حوزو له آمرینو یې د جدي اقداماتو غوښتنه کړې وه.
بلخوا طالبان هم ځان د کابل د امنیت په تامین کې ونډه وال بولي. دوی د کابل ښار د احمد شا بابا مېنې په ځينو برخو کې ابلاغیې خپرې کړي او ویلي یې دي چې د دوی ځانګړې قطعې په کابل ښار کې ګرځي او د غلو پر وړاندې به مبارزه کوي. د طالبانو په ابلاغیه کې راځي: ((په کابل ښار کې غله او جنایتکاران ډېر شوي چې د خلکو ژوند یې تریخ کړی دی. موږ به په کابل ښار کې ټول غله، جنایتکاران، انسان تښتوونکي او وېره اچوونکي یا وژنو او یا یې هم نیسو)).
طالبانو تر دې وړاندې د پنځمې حوزې او پغمان ولسوالۍ په ځينو سیمو کې هم ورته اقدامات کړي وو او خلکو ته یې د امنیت د تامین ډاډ ورکړی و. همدا راز یې په غلام حیدرخان کلا کې د کابل ښار پر لویه لار هم د امنیت د تامین ځینې مانورونه کړي وو او ویډیوګانې یې په ټولنیزو رسنیو کې خپرې کړې وې.
بلخوا د ټولنیزو رسنیو کاروونکي بیا د طالبانو ابلاغیه د حکومت لپاره ستر شرم بولي. د دوی په خبره، حکومت په دې بریالی نه شو چې په کابل ښار کې امنیت تامین کړي او اوس دا دی وسله وال طالبان ځان د کابل د امنیت لپاره ژمن بولي او په دې برخه کې د همکارۍ ډاډ ورکوي.
